Dahnuengx gou bineix yienz- naeuz ngamq ndaej 6 bi, hoeng de cix maj ndaej maqhuz sang, bizbwdbwd, lwgda nyaeq cingsaenz dahraix, aenbak de gig cejlej, vunzlai cungj gyaez de.

Dahnuengx gou mboujdanh coengmingz, lij gig roxsoq.

Ngoenz he daxmeh bae ranzdaiq lo, daengq daxboh daiq dahnuengx, hoeng daxboh banhhaemh dauq ranz seiz cungj gwn laeuj fiz liux, ngamq haeuj rug iq couh ninz ndaek lo. Dahnuengx youq ndaw rug hung hix ninz ndaek lo.

Byonghhwnz, dahnuengx ndiu gvaqdaeuj, yawjyawj mbouj raen bohmeh youq henz ndang, couh daejnga’nga. De daej ha daej ha, sawqmwh dingqnyi daxboh gyaen- hwhw, seizhaenx ndaw ranz cungj mbouj hai daeng, dahnuengx couh swnh gij singgyaen gag byaij daengz rug nyaeq bae ra daxboh, de yawjraen daxboh ninz ndaekfofo, hix mbouj heuh daxboh ndiu, couh gag youq henz ndang daxboh ninz ndaek lo.

10 diemj lai cung daxmeh dauqranz lo, youq ndaw rug hung baenzlawz cungj ra mbouj raen dahnuengx, daxmeh haeuj daengz rug iq cij raen dahnuengx cingq caeuq daxboh caenx youq gwnz mbonq gaebgedged haenx ninz. Dahnuengx ndiu le daxmeh cam de: “Vihmaz mwngz mbouj heuh daxboh ne?” Dahnuengx naeuz: “Gou mbouj siengj nauh daxboh, lau de yietbaeg mbouj gaeuq.”Daxboh daxmeh dingq le cungj riuhaha.

Dahnuengx gou dwg mbouj dwg youh coengmingz youh roxsoq ha?

(Sugij hoiz)