Ngoenzneix banhaet, daxmeh hawj gou guhcawj, daengz hawjciengz bae cawx byaek. Haha, gvaqyinx!

Gou naemj ndei cawx gijmaz byaek le, couh buet bae hawbyaek. Gou byaij daengz dangqnaj danbyaek mehsimj seiqcib lai bi he. Caenhraen aen dan de miz makyungz、maenzgat、lauxbaeg、byaekheu……Yienghyiengh cungj miz. Mehsimj riunyumnyum cam gou:“Siuj baengzyoux yaek cawx gijmaz byaek ha?”“O，maenzgat geijlai ngaenz gaen ha?”“Song maenz gaen.”Gou hawj de bang caengh aen he, o, baenz song gaen!

Gou caenh dajsuenq cawx song yiengh byaek. Seizhaenx gou yawjraen yahbuz byoem hau he, aen dan de ngamq miz geij yiengh byaek. Gou naemj, bouxgeq wnggai mbouj yaeuh lwgnyez ba. Gou caeuq de cawx song gaen byaekheu. Yahbuz doq caengh doq naeuz gou:“Bouxwnq gou aeu song maenz haj, yawj mwngz dwg lwgnyez, aeu song maenz couh ndaej lo.”Gou hix mbouj siengj gijmaz, riuj byaek couh dauqma. Byaij daengz buenq loh, gou lumjbaenz roxnyinh mizmaz mbouj doiq: Cungj dwg song gaen byaek, vihmaz byaekheu mbaeu baenzlai ne? Baez doiq caengh, caen dwg bw, bouxgeq yaeuh lwgnyez lo. Yaek bae ra yahgeq gangj leix, siengj yaep he youh mbouj bae lo, suenq dwg baez hit son gvai ba.

Bingzseiz, yawjraen daxmeh cawx byaek banh bae banh dauq, nyinhnaeuz gig genjdanh, siengj mbouj daengz, gig mbouj yungzheih bw.

(Sugij hoiz)