Seizdaih cingq bienqvaq, seiq- gyaiq cingq fazcanj. Yinzhoz Siujyoz hix fatseng bienqvaq mbwn fan deih byonj.

Yawj! Byaij haeuj ndaw yozyau bakdoulaux, baij youq lwgda raeuz couhdwg aen cauhcangz hung gvangqlanglang bingzbwdbwd ndeu. Baihdoeng cauhcangz dwg aenranz gwnngaiz ngamq guh baenz, vaxmeng ciuq youq laj nditrongh ronghliklik, gij doxgaiq ndaw aenranz gwnngaiz yienghyiengh cungj miz, youq dieg neix gwn ngaiz, caen dwg gwn ndaej hom lai. Baihsae cauhcangz miz go faexrungz hung ndeu, go faexrungz hung neix lumj boux saubingh nei hwnzngoenz souj aenhag raeuz. Seizhah, ngoenz ndit haenq, gyoengq doengzhag cungj gyaez youq laj gofaexrungz hung neix yietliengz、 guhcaemz. Baihbaek cauhcangz ngamq guh baenz aen daizfoux moq ndeu, bineix “6·1” cietlwgnyez, gyoengq doengzhag couh youq gwnz daizfoux neix byaujyenj cezmuz ndei, caen dwg vaiqvued dangqmaz, nauhyied raixcaix.

Siengj daengz aenhag seizgonq, caen dwg hawj raeuz lumz mbouj ndaej. Gwnz cauhcangz gumzgumz gemxgemx di he hix mbouj bingz，gaiqrin hung iq mbouj doengz, dieg- dieg cungj miz, ciengzseiz fatseng siuj baengzyoux youq gwnz cauhcangz guhcaemz mbouj siujsim laemx ok lwed cungj saehcingz neix. Mbouj miz daizfoux, daengz “6·1” cietlwgnyez, mbouj ndaej guh hozdung, ndaw hag caemrwdrwd. Mbouj miz dieg gwn ngaiz, cawj ngaiz youq laj bungzci, ndaw hag luenhlablab. Gwnngaiz seiz, gyoengq doengzhag couh seizbienh youq gwnz cauhcangz naengh roengzdaeuj couh gwnngaiz lo.

Docih cwngcwz ndei gungcanj- dangj, hawj yozyau raeuz bienqvaq yienghneix hung. Raeuz itdingh insik saedceij ndei seizneix, aeu roengz- rengz doegsaw, majhung le cij ndaej dawz yozyau raeuz gensez ndaej engq ndei. （指导老师：覃玉往）