Muengh ha, muengh ha, bineix betnyied cihngux dauq- daej daeuj daengz lo. Ranzranz cungj gaj gaeq gaj bit daeuj caeq cojcoeng swhgeij. Mbwn lij rongh couh gwn haeuxcaeuz，couh caj ronghndwen dahsau okdaeuj lo. Dou daengx ranz vunz cungj benz hwnj gwnz dingj laeuz bae, dawz daiz daengq baij ndei, gwnz daiz baij miz haujlai cungj nyiedbingj mbouj doengz，lij baij makbug、makgam dem. Daxbuz riu- nyumnyum dwk gangj:“Gij doxgaiq neix dwg aeu daeuj caeq ronghndwen, gouz roenghndwen baujyouh raeuz daengx ranz vunz bingzan.” Dou cungj naengh youq henz daiz gangjgangj riuriu, vaiqvued dangqmaz, caj ronghndwen okdaeuj. Ai! Mbouj ndei lo, gwnz mbwn doek fwn lo, dou ganjgaenj sousib doxgaiq haeuj ndaw ranz bae. Caen hawj vunz saetmuengh, dahnuengx sieng- sim dwk daej hwnjdaeuj, daihgya cijnaengz hai densi daeuj yawj. Yawj ha yawj ha, sawqmwh dingqnyi Vangz daxlungz hemq hwnjdaeuj: “Ronghndwen okdaeuj lo! Ronghndwen okdaeuj lo!” Dou ciengj gonq lau laeng dwk buet ok baihrog bae, cijraen ronghndwen lumj rap gijmaz doxgaiq naek nei menhmenh daj ndaw fwj benz hwnjdaeuj, fatok gij rongh moengzmoengz loengzloengz. De gag youq ndaw fwj byaij ya byaij ya, lumj bouxlaux byaij menhyakyak nei. Henz de mbouj miz ndaundeiq buenx, yawj gvaqbae dwg yienghneix gadog、yienghneix fouz naihhoz. Yawj le cib lai faen cung, lij dwg yawj mbouj cingcuj yienghceij ronghndwen. Mbouj miz maz ndei yawj, dahnuengx couh nauh baema lo, daihgya hix baema ranz lo.

Miz coenz vah ndeu gangj ndaej ndei:“Ronghndwen cib- ngux cibroek luenz.” Haemh- neix dou yienznaeuz mbouj ndaej yawj gaeuq ronghndwen, hoeng gou saenq ronghndwen ngoenzcog engq luenz engq rongh. （指导教师：覃月素）