Aen naj luenzlulu, aen dungx bizbwdbwd, song diuz ga lumj ga duzciengh nei, naek baenz 52 goenggaen, hoeng bineix ngamq ndaej 11 bi, de couhdwg Lij Ciningz.

Heuh Lij Ciningz baenz “bouxgwn” , baez dingq couh rox, de maij gwn! De banhaet gwn haeuxcaeux, banringz gwn haeuxringz, banringzgvaq gwn saejdaeuz, banhaemh gwn haeuxcaeuz, byonghhwnz lij gwn donq dem cij ninz. De byaij daengz gyawz gwn daengz gyawz, seizseiz cungj dwg gwn, gwn, gwn! Geiq ndaej miz baez he, de gingqyienz youq gwnz dangz yijvwnz caeg gwn saejdaeuz, doeklaeng mboujdanh ngaiz lauxsae muedsou saejdaeuz, lij ngaiz fad ndwn dem. Hoeng de lij lumjbaenz mbouj miz saeh nei, laeglemx lwnh boux- doengzdaiz:“Sou bae bau saejdaeuz ndeu lau gijmaz, ndaw daehsaw gou lij miz haujlai dem!” Gangj sat, de lumjbaenz seiqhenz mbouj miz vunz nei youh dawz bau saejdaeuz he okdaeuj laebdaeb gwn. Lauxsae ngaiz cungj cingsaenz de “gamjdoengh” lo, couh mbouj leixlangh de, gaggoq hwnj dangz, hawj Lij Ciningz siengj baenzlawz gwn couh baenzlawz gwn. Lij Ciningz gwn imq le, yungh genbuh uetuet aen bak, lumjbaenz lij dauqngeix gij feihdauh ndei ndaw dungx nei.

Lij Ciningz yienznaeuz maij gwn doxgaiq, hoeng de hix gig gwn ndaej haemzhoj bw. Miz baez he, ban dou caeuq ban wnq doxdax bengcag, mwh seiz ban dou yaek saw, Lij Ciningz dawz saejdaeuz dauj roengz ndaw bak, hemq naeuz:“Gou yaek heiqndat lo!” Vah ngamq ok bak, de couh yungh rengzgut baez rag, diuz cagdaeuz hainduj rag coh mbiengj ban dou, ban dou doeklaeng ndaej hingz lo.

Yienznaeuz dou dwgcaengz Lij Ciningz maij gwn, hoeng de maij aen ban dou, nyienh vih ban dou gwn haemz gwn hoj, cungj cingsaenz neix dou aeu hagsib cij baenz!

(Bouxhoiz: Sugij)