Moix vunz cungj miz seizoiq, miz haujlai saehyinx seizoiq gvaq geijlai bi cungj lumz mbouj ndaej.

Geiq ndaej seizoiq, ndaw hongh miz go makgam he, gou ngoenznaengz cungj youq gwnzde ved ndang sang, gou itcig laihnaeuz, baeznaengz gou cungj sang gvaq baezgonq. Hoeng miz ngoenz he, gou angqvauvau bae dag ndang sang, fatyienh swhgeij beij baezgonq daemq haujlai. Gou buet bae cam daxmeh:“Daxmeh, vihmaz gyoengq doengzdoih cungj maj sang, gou cix maj daemq ne?”Daxmeh dingqnyi le, cam: “Vihmaz baenzneix gangj ne?” Gou ndwn hwnj gwnz eij naeuz hawj daxmeh: “Gou ngoenznaengz cungj bae laj go makgam ved ndang sang, hoeng ngoenzneix gou lij beij gizved ngoenzlwenz haenx daemq!” Gou rag fwngz daxmeh haeuj ndaw hongh vix hawj de yawj, daxmeh baez cim gomak, couh riu lo, gaendwk de rubrub aen gyaeuj gou, riu dwg naeuz: “Mwngz rox mwngz vihmaz beij gizved haenx daemq lwi? Aenvih mwngz majsang mbouj vaiq, gomak cix maj ndaej beij mwngz vaiq, ndigah mwngz ngoenzneix daeuj dag couh laihnaeuz beij ngoenzlwenz daemq lo.” Dingq gij vah daxmeh le, gou gag riumwnh lo.

Seizneix dauqngeix gij saehyinx seizoiq, gou cungj dingj mbouj ndaej gag riunyaen.

(Bouxhoiz: Sugij)