Seiz Veiz Gozcingh maeuqdiemj youq Liengzdungz haenx, itbuen gij hozdung duh swcigih dangjcwng gihgvan, de cungj mbouj bae camgya gvaq, dandan baez ciepraen neix, de mboujdanh swhgeij bae camgya, lij iu le Ho Yiyenz、Anh Bingzswngh doxcaeuq camgya. Aenvih song boux goengdaeuz neix caemh youq Guengjdoeng guh gvaq fuswngjcangj.

Veiz Gozcingh caeux dingqgangj gvaq, vunzguhnaz Cauzsan gig ak ndaem naz, sijsaeq dajndaem, canj- liengh gig sang. Bi 1964 nienzco, de bae cunghnanzgiz hai hoih, ndaej rox Diegbingz Cauzsan 7 aen yienh si 200 lai fanh moux haeuxsonggeiq, bi 1963 bingzyaenz mouxcanj ndaej 1106 gaen, hoeng seizneix gij haeux- songgeiq Guengjsae, bingzyaenz mouxcanj cij ndaej 400 lai gaen. Doengzyiengh dwg ndaem naz, doxca baenzlaux, de it fuengmienh gamj- daengz nungzyez Guengjsae doek- laeng, lingh fuengmienh caemh gamjdaengz Guengjsae ndaem naz haemq miz rengzndumj.

Doiq Guengjsae mbefat haeux- gwn, Veiz Gozcingh caeuq geij boux suhgi dangjveij ndaw gih, soqlaiz cungj daezciengq song diuz ga byaij loh, it dwg demgvangq dieggeng, ngeih dwg daezsang canjliengh. Yawj gyae bae, demgvangq dieggeng cungj dwg miz hanhdoh, hoeng daezsang dancanj ne rengzndumj gig laux.

Haeuxnaz ok ndaej lai roxnaeuz noix, haemq daih cingzdoh dwg souh suijli、namh、bwnh、ceh caeuq nazreih bingz mbouj bingz daengj gij doxgaiq neix yingjyangj. Hoeng, roxdaengz gij cingzgvang Cauzsan le, gij swhsiengj bouxvunz caeuq gij dinfwngz daj- ndaem caemh miz cozyung youqgaenj.

Dieg Cauzsan vunz lai nazreih noix, gyoengqde youq suijli、namh、bwnh、bingzcingj nazreih daengj fuengmienh cungj miz gij diuzgienh ndei. Daih dingzlai diegfueng Guengj- sae ne, siengj cauh baenz gij diuzgienh neix, lij aeu ciengzgeiz roengzrengz cij ndaej. Hoeng, gij swhsiengj vunzguhnaz Cauzsan ndaem naz hawj gwzming haenx caeuq gij dinfwngz gohyoz ndaem haeuxnaz gyoengqde, vunzguhnaz Guengjsae ne ndaej doq bae hag ndaej, caemhcaiq sikhaek ndaej ok hongndaej.

(caengz sat)