(ciep geizgonq)

Vahsug gangj: Saeh ndei mbouj gyaeraez. Caen dwg yienghneix bw! Cingq youq ranz Aungeih saedceij gvaq ndaej haemq ndei seiz, cix fatseng gienhsaeh hawj Aungeih caen siengj mbouj daengz ndeu. Ngoenz- haenx dwg ngoenzhaw, haw sanq le, vunzmbanj miz caet bet boux caez naengh aen ci siujswlunz dauqma ranz, ci hai daengz buenqloh, aenvih sabci mbouj ndaej, roengz lohlingq seiz fan roengz lajroen bae. Caet bet bouxvunz ndaw ci cungj deng daenz youq laj ci. Saehcingz gaenjgip, miz vunz ganjma ndaw mbanj bauq, heuh Aungeih vaiq bae gouq vunz, Aungeih dingqnyi vunz bauq le, sikhaek ganj bae yawj. Mwh Aungeih ganj daengz, baez cazyawj, dah lwgsau dengsieng naek haenx gaenq goenqheiq lo. Dah lwgsau neix caeuq Aungeih caemh ndaw ranz caencik nei. Couhcinj Aungeih geijlai mizsim siengjgouq dah caencik neix, hoeng, mbouj miz rengz aeu mbwn cienq dauq. Aungeih siengsim dwk youh bae gouq lingh geij boux deng sieng haenx, caenhliengh gemj mbaeu gij in gyoengqde. Ciuqleix gangj, Aungeih yienghneix gouq vunz mbouj loek saek di, hoeng couh dwg gienh saeh neix, hawj Aungeih simnyap daengz seizneix, lumjnaeuz de guh baez saehloek hung ndeu.

Saehcingz dwg yienghneix, Aungeih bang geij boux dengsieng mbaeu haenx roengz yw le, dauqmaz daengz ranz, dingqnyi vunz mbanj gangj bouxhaici rox ci daenz dai vunz le, siengj mbouj doeng, gag dauqma ranz, gwn ywnungzyoz, seizneix youq ndaw ranz yaek dai lo. Aungeih baez dingq, ndawsim siengj : Fan ci gaenq dai bae boux vunz ndeu lo, baenzlawz lij aeu dai vunz ne. Aungeih sikhaek buet coh ranz bouxhaici bae, muengz laeng muengz naj, nyengh dawz boux de daj ndaw fwngz duzfangz duet dauqma, bouxhaici ndaej gouq lo. Daeggo dah lwgsau dai bae haenx, siengj hawj boux hai ci haenx dai bae, byawz rox seizneix, Aungeih dauqfanj dawz de gouq dauq, simnyap dangq- maz, laihnaeuz dwg Aungeih mbouj goq naj beixnuengx, mboujdanh mbouj gouq caencik swhgeij, dauqfanj bae gouq ndaek vunz hai ci fan daenz dai dahnuengx swhgeij, couh hujdengdeng dwk ndaq Aungeih yak dingq yak rwz. Daj seizhaenx hwnj, ranz lwgsau dai bae haenx caeuq ranz Aungeih goenq lo. Vunz ranz lwgsau dai bae haenx, lij youq najvunz laengvunz gangj vahrwix Aungeih, cug riengmax doxdik, hawj vunz ndaw mbanj lai dwgcaengz vunz ranz Aungeih.

Gvaq geij bi le, ranz Aungeih hwnq ranzlaeuz seiz, daeggo lwgsau dai bae haenx, youh ndumj saeh lo,sien dwg gangj ranz Aungeih luenh cimq dieg guh ranz, caiq dwg gangj ranz Aungeih baenzlawz gungzgoj, byawz bang de hwnj ranz laeuz, caemhcaiq lij bien goj gangj Aungeih seizgonq iemq cienz vunz, seizneix hwnj ranz, lau dwg bae gizlawz caeg ndaej cienz daeuj hwnj. Mboujlwnh daeggo lwgsau baenzlawz gangj, cungj dwg aensim ndeu, mbouj siengj hawj Aungeih gvaq ndaej ndei, hawj vunz liz Aungeih gyaegyang bae. Yungh cungj banhfap neix daeuj bauqhaemz Aungeih, doiq ndaw ranz beixnuengx baenzneix, Aungeih mbouj guh saekdi sing, Aungeih nyinhnaeuz “boux mbouj guh caeg, aek mbouj dot”, caih vunz baenzlawz gangj, swhgeij byaij ndaej cingq, lau de dangq viz. “Roen gyae rox rengz max, ngoenz raez rox sim vunz.” Mwngz gangj duh mwngz, gou guh duh gou. Saenq ndaej gwnz mbwn miz da, vunz guh gijmaz, gwnz mbwn cungj rox.

Dahraix, caenhguenj daeggo lwgsau haenx baenzlawz gangjsedsed, gyoengq vunz mbanj cix mbouj saenq vahfangz de. Youq bilaeng ndaw mbanj senj duicangj seiz, gyoengq vunz ndaw mbanj cungj senj Aungeih guh duicangj. Aungeih hix mbouj hawj vunz mbanj satmuengh, de daiq gyoengq vunz ndaw mbanj, doxgiet doxhuz guhbaenz goengloh suijniz doeng daengz ndaw mbanj, lij daiq vunz ndaw mbanj dawz diuz rij iq gaij baenz diuz suijli sam mienh lwenq, caiq lij daiq gyoengqvunz ndaw mbanj dawz ngau rin yaek doek gwnz dingj- bya laeng mbanj buen deuz, cawz baez vunz ndaw mbanj seizseiz yousim haenx.

Aungeih couh dwg boux vunz yienghneix, naeuz mingh ndei ma, youh mingh rwix. Miz vunz gyaez de, hix miz vunz dwgcaengz de.Hoeng, mboujguenj baenzlawz yiengh gvaq- daeuj, daengz seizneix, gyoengq vunz mbanj de, vanzlij caenciet dwk heuh de guh “Aungeih”.(sat)