Sai: Nuengx ndaw suen miz mak,

Go cup bak hozhaenz;

Cam mwngz dah nuengxngaenz,

Nyaemq saek aen ndaej mbouj.

Mbwk: Mak caengz doek saejndw,

Beix gwj cam gwj haemq;

Daengz ndaej sou seizhaenx,

Lau beixngaenz ndi ngah.

Sai: Mak hoij rim gwnz go,

Beix soh yaek dai ngah;

Ndi ndaej gwn cixbah,

Danh ndaej gvaq laj go.

Mbwk: Gvaq laj go guhmaz,

Lau rumhaz oen camx;

Beix aeu byaij loh gvangq,

Byaij cingqdangq loh ndei.

Sai: Langh ndaej gvaq laj go,

Beix hoz cix lai hai;

Youq laj go youz byaij,

Ndaej gaijhat yietliengz.

Mbwk: Mbwn hwngq ndit youh ndat,

Hozhat sim engq fanz;

Song raeuz ma coh ranz,

Gungh aenvanj gwn souh.

Sai: Langh nuengx gangj yienghneix,

Couh bae cam ranz mwngz;

Domh mak caengz hai gwn,

Raeuz song vunz cix hah.

Mbwk: Cam ndi cam bouxlaux,

Nuengx dauq ndi mizmaz;

Ceiq lau beix gangjgyaj,

Gwn gvaq cog youh lumz.

Sai: Beix cien caen fanh caen,

Mbouj saenq mwngz daeuj bop;

Daj aek daengz ndawndok,

Caih mwngz bop mbat gaeuq.

Mbwk: Bop aek ndi rox sim,

Mo din ndi rox gyaeuj;

Langh beix mwngz ndi yaeuh,

Cix aeu mbwn guh cingq.

Sai: Gwnzmbwn miz duzbyaj,

Baihlaj miz duzyou;

Langh beix dwg sim yaeuh,

Byaj bag gyaeuj daisieng.

Hab: Fanhfanh ngeix mbouj daengz,

Bouxlaux haengj hai bak;

Song raeuz haeuj suenmak,

Cup bak baenz ciuhvwnz.