Gou gyaez saw，gingciengz caeuq saw guh buenx. Seiz iq，gou mbouj rox geijlai saw，cungj dwg heuh daxboh gangjgoj，baez dingq gojgaeq，gou couh sim’angq.

Doeg sam nienzgaep seiz，miz baez he，gou cam daxboh：“Mwngz baenzlawz rox gangj baenzlai gojgaeq ne？”Daxboh naeuz：“Saw dwg lauxsae iq，de rox son mwngz baenzlawz hagsib，baenzlawz roxsoq！”

Daj seizhaenx hwnj，gou baez miz seizgan，couh youq ranz yawj saw. Gou yawj saw mboujdanh mbouj mbwq，lij roxnyinh gig mizyinx dem. Gou daj ndaw saw hag ndaej haujlai cihsiz，sawj gou roxyiuj haujlai dauhleix. Gou ngoenz lawz mbouj yawj saw，couh lumjbaenz lumz gwn donq ngaiz ndeu nei.

Saw baenz baengzyoux ceiq ndei gou，ngoenznaengz gou cungj caeuq de doxraen. Docih de buenx gou maj hung，docih de soengq hawj gou baenzlai cihsiz，docih de sawj gou bienq ndaej baenzneix maenh’ak.

（haj nienzgaep Vangz Lizfeih）