Youq ndaw lwgda daxboh daxmeh，gou ciengxlwenx dwg boux lwgnyez maj mbouj hung ndeu. Swhgeij caeuq baengzyoux okbae guhcaemz，bohmeh cungj daengq bae daengq dauq：Mbouj ndaej caemz feiz，mbouj ndaej luenh gwn doxgaiq bouxwnq……Cigdaengz gou ok dou le cij dingz bak. Gizsaed，bohmeh baenzneix guh dwg gvensim gou. Hoeng，gou gig siengj doiq gyoengqde gangj coenz vah ndaw sim gou：“Gou mbouj nyaeq lo.”

Lij geiq ndaej mwh gou hwnj it nienzgaep seiz，bohmeh bang gou cawx le haujlai vwnzgi: Bit、cik……Yienghyiengh cungj miz. Ngoenz haihag，mwh gou aemq aen daehsaw yaek bae hagdangz seiz, daxboh naeuz yaek soengq gou hwnj hag, gou naeuz hagdangz byaij yaep he couh daengz, gou rox gag bae, mbouj yungh soengq. Hoeng daxboh itdingh aeu soengq, gou cijndei hawj de soengq. Daengz hagdangz le, gou heuh daxboh banringzgvaq gaej daeuj ciep lo, gou rox gag dauq ranz, gou gaenq maj hung lo. Daxboh mbouj miz banhfap, couh dapwngq lo.

Banringzgvaq cuengqhag seiz, baihrog doek fwnmoenq, caeklaiq ok dou seiz gou daiq aenliengj, gou gang liengj byaij dauq ranz. Mwh gou byaij daengz bakdou ranz, raen daxboh daxmeh itcig ndwn youq bakdou caj gou dauq ranz seiz, raemxda gou doek- byoegbyoeg.

Daxboh daxmeh, gou mbouj nyaeq lo, sou mboujcaiq baenz causim lo, hoeng ndawsim gou ciengxlwenx gyaez sou!

(sam nienzgaep Couh Dungz)