Singgeiz sam cuengqhag seiz，Lij lauxsae hawj dou buci hangh cozyez daegbied he：Vat duzndwen. Dwen daengz duzndwen， ndaw uk gou sikhaek yienh’ok aen doz baenzneix：Duzndwen uqlah daengx ndang cungj baenz boengz haenx，youq ndaw namh nod bae nod dauq，dwgcaengz raixcaix. Hoeng caiq dwgcaengz hix mbouj miz banhfap，cozyez lij aeu lauxlaux saedsaed bae guh.

Cuengqhag le，gou caeuq geij boux doengzdoih doxcaez bae vat duzndwen. Daxboh dingqnyi dou yaek bae vat duzndwen，angqvauvau dwk naeuz：“Gou daiq sou bae，seiziq gou vat duzndwen ak lai bw！”Daxboh dawz faggvak he caeuq aen bingz he couh daiq dou ok dou lo

Lauxsae lwnh dou，duzndwen ceiq maij youq giz youh amq youh dumz haenx. Baenzneix，dou senj youq laj godauz hung he vat duzndwen. Daxboh mbak roengzbae，namh couh soeng liux，gou menhmenh mbek hai gaiq namh he，sikhaek couh yawjraen duzndwen lohgangh ndeu cingq ngutngeuj aen ndang de. Gou ganjgip gaeb de cuengq haeuj ndaw bingz bae，youhcaiq dawz di namh he dwk roengz bingz bae. Youq dieg namh daxboh vat haenx，gou raen duzndwen he baez iet baez suk yaepyet couh mbouj raen lo，lumjbaenz caeuq gou doxndoj nei.

“Daeuj yawj vei，gou gaeb dawz duzndwen raezrangrang he！”“Va，gizneix miz baenzlai ha.”“Duzndwen neix hoengzoo！”……Gyoengq doengzhag hemq dwk. Gou raen vat duzndwen baenzneix mizyinx，gen fwngz hix haenz lo，gou vax gvaq faggvak，baez mbak roengzbae，a，duzndwen he ngaiz gou mbak goenq lo. Song donh ndwen youq baihnaj gou diuqbubbub，lumjbaenz hemq，in lai lo，in lai lo. Daxboh naeuz：“Gaej lau law，duzndwen goenq geijlai donh cungj mbouj dai，donh mbouj miz gyaeuj haenx gvaq mbouj geij nanz couh gag maj aen gyaeuj moq he okdaeuj lo，donh mbouj miz rieng haenx hix gag rox maj rieng ne.” Va，caen dwg saenzgeiz lai lo，siengj mbouj daengz vat duzndwen lij hag ndaej baenzlai cihsiz dem.

（seiq nienzgaep Vangz Yinghbauj）