Banhaemh singgeiz haj, gou youq ranz sij cozyez, daxmeh cingq yawj densi. “Ling、ling、ling……” Dienhvah yiengj lo, daxmeh dawz hwnj dienhvah baez dingq, laxlawz dwg daxboh haemh neix mbouj dauq ranz gwn caeuz, yaek youq baihrog gwn. Gou doq sij cozyez doq naemj: Haemh neix daxboh dwg mbouj dwg youh gwn laeuj fiz le cij dauq ranz ne, danghnaeuz gwn laeuj le caiq hai ci……. Gou yied naemj yied lau. 7 diemj、 8 diemj、9 diemj……. Seizgan gvaq 10 diemj lo, daxboh lij caengz dauq ranz. Daxmeh hix you daxboh lo.

“Dung、dung、dung……”Sing bongx dou gvaq le, daxboh daengz ranz lo, gou caeuq daxmeh cijndaej soeng gaemz heiq he. Daxmeh cam:“Baenzlawz byonghhwnz cij dauq ranz ha?” Seizneix daengx ndang daxboh cungj haeu gij heiq laeuj, naj de hix hoengzoo, byaij roen saemxsaemx saxsax. “Song mehlwg cuengqsim ndei lo, gou mbouj fiz……” Daxboh gangj mbouj baenz geij coenz vah, yaep he couh naengh youq gwnz daengqeij ninz ndaek lo. Yawj daengz daxboh aen yienghsiengq neix, gou caen siengj doiq de naeuz:“Daxboh, gou rox mwngz ngoenznaengz sinhoj guh hong, dwg siengj hawj gou caeuq daxmeh saedceij gvaq ndaej engq vuenyungz engq vaiqlag. Hoeng mwngz hix aeu gvensim ndangdaej swhgeij cij ndaej ha!”

Caen maqmuengh daxboh gaej gwn baenzlai laeuj lo.

(seiq nienzgaep Ganh Yijsenh)