Youq ndaw sim gou, daxboh gizgiz cungj ndei, mbouj sang mbouj daemq vunz miz di bizbwd, byoemgyaeuj ndaemndwt, raek fouq nganxciuq he, ngoenznaengz riunyumnyum. Hoeng de miz yiengh he mbouj ndei, couhdwg de daegbied maij cit ien.

Daxboh cit ien ndaej haujlai bi lo. Daxmeh gingciengz damz de, naeuz cit ien sai ngaenz youh doiq ndangdaej mbouj ndei, hoeng daxboh cungj dingq mbouj haeuj rwz. Gou menhmenh maj hung le, hix rox daengz gij haihcawq cit ien, hainduj caeuq daxmeh fanjdoiq daxboh cit ien. Miz seiz, daxboh cingq cit ien, gou couh buet gvaqbae, daj ndaw bak de dued diuz ien gvaqdaeuj. Daxboh doeknaiq naeuz:“Dahlwg ha, gou ngoenzcog couh gaiq ien!” Daxboh cungj dwg gangj ndwi, gou couh gangj dauhleix hawj de nyi:“Gaiq ien couh lumj hagsib nei, aeu haenqsim, aeu genhciz cijndaej. Mwngz caiq baenzneix, baezlaeng gou hix mbouj dingq vah mwngz lo!”Daxboh dingq le, cit ien ngoenz beij ngoenz noix lo.

Daxboh yienznaeuz gyaez cit ien, hoeng gou siengsaenq, miz daxmeh caeuq gou doengzcaez“guenj”, de itdingh ndaej gaij bae aen sibgvenq vaih neix.

(seiq nienzgaep Liuz Lizfeih)