Ranz gou ciengx duz ma ndeu, dwg mehnax soengq hawj gou.

Duzma yawj hwnjbae lumj aen giuz he nei, daengx ndang cungj dwg bwn hau, gwnz gyaeuj boekbit de maj song duj rwz soemditdit, song ceh lwgda youh hung youh luenz, aen’ndaeng ndaemndwtndwt, baez aj bak, gij heuj de youh soem youh raez, henz bak lij miz geij diuz mumh raezrangrang. Seiq diuz ga de cangq raixcaix, lij miz diuz rieng raez dem. Moix baez gou umj de, cungj roxnyinh raeujrubrub.

Duzma mboujdanh dwg- gyaez, lij dam gwn.

Miz baez he gou ngamq cuengqhag dauq ranz, duzma couh lumj raen baengzyoux ndei nei, bi rieng boek gyaeuj coemj gvaqdaeuj, hainduj gou laihnaeuz de guh’unj, dik de baez he. Mwh de hojlienz dwk yawj gou, gou couh geizheih lo, miz maz saeh la? Dwg mbouj dwg iek lo? Gou daj ndaw binghsiengh dawz song gaiq noh hawj de gwn, de gwn liux le lij bi rieng ngauz gyaeuj, lumjbaenz mbouj muenxeiq nei. Gou ndaq de:“Hw, gou caeg noh hawj mwngz gwn lo mwngz lij mbouj habhoz？”

Duzma raen gou ndaq de, mboujdanh mbouj lau, vanzlij yungh song ceh da de hojlienz dwk yawjngonz gou, gou sim’in de, youh aeu gaiq noh he hawj de gwn. Daengz seiz gwn haeuxcaeuz, gou daek vanj haeux he hawj de, de couh lumj duz mabag nei doq gwn doq ngaek gyaeuj, lumjbaenz gangj naeuz:“Caen ndei gwn, ndei gwn lai lo.”

Duz ma ranz gou dwggyaez lai lo, gou maij caeuq de guhcaemz, gou maij caeuq de guh baengzyoux.

(haj nienzgaep Sunh Yezyaz)