Dandan geij ndwen neix, Veiz Gozcingh cix gig gvansim Liengzdungz swnghcanj caeuq gensez, gvansim nungz、ndoeng、langhciengx、nungzfu、dwkbya、bya ndoi、raemx、nazreih、faex、roen gij hong dieg neix. Mboujlwnh dwg vunzlai gwndaenj gaenjaeu gijmaz, lijdwg vih cauhfuk lwglan bae guh gviveh ciengzgeiz, de cungj ngeixnaemj caez lo.

De lai baez caeuq gyoengq gunghcozdui naeuz: “Raeuz caezgya daeuj Liengzdungz, couh aeu caeuq ganbu vunzmbanj Liengzdungz doengzcaez guh ndei swnghcanj gensez, guh ndei gviveh. Mwh gunghcozdui caengz deuz, raeuz itdingh aeu guh bang gensez goekdaej ndaej ciengzgeiz miz cozyung haenx okdaeuj louz hawj ndaw mbanj.”

Youq de sonyinx caeuq dukcoi lajde, gij swnghcanjdui Liengzdungz aenaen cungj laebbaenz nungzgoh siujcuj, daih dingzlai cungj saedhengz genj yungh ceh ndei、hableix coq bwnh、habdangq ndaemdeih、 hableix rwed raemx、yawhfuengz fatnon fatbingh、habseiz dak naz daengj lai aen cosih ndaem naz gohyoz, hawj gij dancanj haeuxgwn caeuq cungjcanj haeuxgwn cungj ndaej demcanj haemq lai. Aenaen swnghcanjdui cungj banh miz suenmak caeuq diegciengxmou, miz mbangj benq lij doxgap banh miz aencangj cunghab gyagoeng、diegfuyez, demlai souhaeuj cizdij.

Vihliux gaijbienq gij diuzgen swnghcanj Liengzdungz, hawj nungz- yez dieg neix gvaqlaeng guh ndaej engq ndei, Veiz Gozcingh iugouz coihbingz gij nazreih Liengzdungz, guh baenz gij nazreih guenq ndaej、baiz ndaej、yungh ndaej gihgai haenx.

Youq Liengzdungz baenzlawz guh nazsuenvaq, seizhaenx gunghcozdui dawz ok song dauq fueng’anq hawj vunzlai bae yaenglwnh. Dauq daih’it dwg daih coihbingz, vat sang dienz daemq, cienzbouh canj bingz, haenqguh geij bi, hawj Liengzdungz ndaej guh baenz gaiq diegbingz ndeu; dauq daihngeih dwg coihbingz siuj di, ciuq gij dieghingz bonjlaiz haenx, guh baenz gij nazmbaek caezcup. Dox- yaeng dingh le, daih dingzlai vunz laihnaeuz, dauq fueng’anq daih’it sai rengz laux, yungh ngaenz lai, engqgya youqgaenj dwg de yaek buqvaih caengz namhsoeng, hawj gohaeux haujlai bi cungj deng gemjcanj.

(caengz sat)