Sai：Cou daengz yawj mbwn sang

Va’ngaeux rang doh deih

Daemz rangh geij goengleix

Duj beij duj ndei ngonz

Sau：Va’mbu seizcou hai

Deq mbajgvai daeuj lienh

Duzlawz mbin mbouj bienh

Buenx gyoengq lienh dauq ndwi

Sai：Beix siengj bae mbaet va

Hwnj bya nanz bin dat

Oen lai rin youh gat

Mbatlawz cij daengz fwngz

Sau：Gwnzlaeuz hai va gyaeu

Yaek bae couh daeuj vaiq

Ndaw sim cibfaen maij

Geijlai mbouj cuengq fwngz

Sai：Nueugx lumj duj vamoiz

Youq gwnzndoi hailangh

Rwi mbin daeuj guh’angq

Mbaj mbin sang daeuj gyaez

Sau：Nuengx caen lumj vamoiz

Youq bangxndoi mbe naj

Beix yaek siengj daeuj lah

Dap giuz ma doxraen

Sai：Nuengx lumj vahaijdangz

Daengx ndang hom youh moq

Beix siengj byaij bae coh

Gyangroen doh oen lanz

Sau：Nuengx dwg vagimcwx

Bet nyied fwx ma cimz

Danghnaeuz beix miz sim

Rin dimz oen daeuj swnh

Sai：Nuengx lumj vamauxdan

Hai fanh ceij cien hoengz

Daengx ndang ndingloengloeng

Soengq saek duj hawj go

Sau：Mauxdan bengz lumj gim

Miz sim cij ndaej lumh

Daengzcog dai roengz gumz

Doxumj cij dwg gyaez

Hab：Reuz guh va’moegminz

Hai henz rin ndinghoengh

Byaifaex venj daengloengz

Goengheij raeuz baenzdoiq