(ciep geiz gonq)

Yaepyet, daeglan rimbi lo, dahbawx yaek bae caeuq daeggvan dajhong, de naeuz song boux vunz romcienz cungj beij bouxdog rom ndaej vaiq di, rom ndaej ngaenz le couh mbouj caiq yungh youq rog guh baenzlai sinhoj, daeglwg lij iq, de yaek bae mbouj dwg yaek youq hix mbouj dwg.

Buzsam naeuz：“Daeglan youq ranz caeuq gou, mwngz cuengqsim bae ba, gou itdingh guenj ndei de.”

Dahbawx naeuz:“Reihnaz raeuz hawj vunzmbanj bau ba, yienghneix mwngz cij ndaej cienzsim bae goq lwgnyez, gou cix onjsim.”

“Ndei, ndei, reihnaz bau hawj vunz guh ba, gou ndeindei ciuqgoq daeglan majhung.”

Daj seizhaenx hwnj, Buzsam mbouj yungh dak ndit rwed fwn bae guh hongdoengh lo. Ndaw ranz ciengx miz song duz mou, cib geij duz bitgaeq, aen suenbyaek bakdouranz haenx ndaem miz byaekgwn byaek- mou, gij hong Buzsam couh dwg dajleix doenghgij hongranz neix caeuq ciuqgoq daeglan.

Youq lajmbanj, bouxgeq haj roekcib bi lij suenq dwg boux vunz ak guhhong ndeu, gyoengqde guh sat hongranz, lij bae doengh bang bouxcoz guh di hong gyoengqde guh ndaej haenx. Gyoengq bouxdoih Buzsam moix baez byaij gvaq bakdouranz Buzsam, raen de ndaej youq lajraemh daiq lan, cungj haenh naeuz Buzsam mizfuk lai.

Ndwenngoenz youq ndaw riu- nyum song buzlan neix byaij bae.Yaepyet bi ndeu youh gvaqbae lo. Buzsam doiq gij saedceij neix muenxeiq dangqmaz, hix gamjdaengz vuenyungz raixcaix.

Ranznden Buzseiq liz ranz Buzsam ceiq gyawj, de seiz mbouj seiz daeuj caeuq Buzsam lwnhgoj.

Miz ngoenz ndeu banhaemh, Buzseiq bae doengh maranz cawj caeuz, dingqnyi song duz mou Buzsam“ngudngud”heuh dwk rwenz doengh gwnzmbwn. “Buzsam ha, ngoenz- ngoenz youq ranz lij ce hawj duzmou baenzneix iek! ” Buzseiq ndawsim gag naeuz.

Buzseiq cawj ndei byaekcaeuz le, bae ranz Buzsam yawjyawj. Song duz mou baez raen vunz daengz henz, heuh dwk saet hwnj saet roengz.

“Yi, yah neix bae gizlawz? Douranz haep baenzneix caed.”

“Buzsam, Buzsam, youq ranz lwi?”Buzseiq doq bongx dou doq heuh, bongx geij baez cungj mboujmiz vunz dapwngq, baez sijsaeq dingq, dingqnyi sing daej lwgnyez daj ndaw ranz cienz okdaeuj.

“Mbouj mizmaz saehrwix ok ba?” Buzseiq ndawsim diuqbubbub, ganj- vaiq maranz, dingjlingz daeglwg caeuq dahbawx hix ma daengz ranz, Buzseiq lwnh gij saeh geizheih ranz Buzsam hawj gyoengqde nyi, gyoengqde dingq le sikhaek buet daengz ranz Buzsam hemq Buzsam, mbouj dingqnyi Buzsam han, cij dingqnyi ndaw ranz cienz daeuj sing daej lwgnyez.

“Mbouj ndei!” Daeglwg Buzseiq gangj sat, fwngz vax dawz ndaek rin ndeu “bang bang” dub vaih conghcueng, daj gizhaenx ndonj haeuj ndaw ranz bae, cij raen Buzsam yiet soh youq gwnzmbonq, gaenq dai ndongj lo, aennaj de nyaeuqgoz, daeglan iqet haenx naengbak hawq- hangq, ninz youq henzndang daxbuz, miz heiq mboujmiz rengz dwk ndaejngeungeu.

Dahbawx Buzseiq umj lwgnyez coh veiswnghsiz ndawmbanj buet bae…… Buzseiq daej naeuz, ngoenz- lwenz mwngz lij ndeindei ne, seizneix mwngz……

Canghyw daeuj yawj le naeuz, Buzsam dwg deng amq myaiz ndeu saekdimz conghheiq cix baenz- neix……Daeglan duetraemx gvaq- bouh ca di hix……

Daeglwg Buzsam got aen guencaiz daxmeh de daej naeuz: “Daxmeh, gou mbouj hauqswnh, gou mbouj wnggai lizhai mwngz……”

(sat)