Gou doeg daengz seiq nienzgaep lo, moix aen haggeiz caemhnaengh cungj deng vuenh, gyoengq caemhnaengh gou gak boux gag miz daegdiemj. Boux caeuq gou caemhnaengh hagsib seiz ndaej doxbang, roengzdangz le ndaej guh baengzyoux ndei. Hoeng aen haggeiz neix boux caemhnaengh gou dwg dah he. Gangj daeuj caen dingjlingz, gou caeuq de lumj miz caeuz nei.

Dah caemhnaengh neix maj ndaej seuqsetset, lwgda ndongqliklik, bak de iqetet hoengzfedfed. Hoeng de miz di leixhaih. Ei, gou ngoenzlaeng aeu nyaenxsouh boux baksoem neix lo.

Song dou miz diuz bien’gyaiq he, byawz gamj hamj gvaq gyaiq, couh cuij lo, song dou cungj gig haeujsim.

Miz baez ndeu, gou bungz diuz suyoz he mbouj rox guh, couh cam gyoengq doengzhag seiq henz, byawz rox gyoengqde hix mbouj rox guh. Mbouj miz banhfap, gou cij ndaej cam de, mbouj siengj daengz de gingqyienz mbouj leixlangh gou, lienz daezmoeg cungj mbouj yawj, lij naeuz:“Gou cungj vunzhuk neix baenzlawz rox guh gij daezmoeg diencaiz cij rox guh neix?” Hw, bak de baenzneix gangj, hoeng gou yawjraen bonj bouh de sij baenz benq, gou couh rox de dwg yaeuh gou caemhcaiq gangj bemx gou. Gou caen siengj fanj naeuz de can he, hoeng youh lau de bak engq soem, ndigah gou mboujcaiq nyex de.

Boux vunz mbouj dwg yienghyiengh cungj hawj vunz dwgcaengz, de hix miz giz ndei, couhdwg de sij cih daegbied ndei, gij cozyez de sij ndaej cingjcingj caezcaez.

Mbangj boux caemhnaengh youq gwnz hagsib ndaej guh doih ndei, mbangj boux baenz baengzyoux ndei, boux caemhnaengh baksoem neix yaek ciengxlwenx louz youq ndawsim gou.(Cau Huj)