Daj iq daengz hung, gou guh gvaq haujlai saeh dwgriu, hoeng ndawde miz gienh ndeu hawj gou itcig mbouj rox lumz.

Geiqndaej gou roek bi bihaenx, miz ngoenz ndeu, daxmeh cawx bau mbawcaz he ma, naeuz hawj gou neix heuhguh caz vamaedlaeh, siengj gwn caz seiz cijaeu sien dwk mbawcaz roengz cenj bae, caiq dwk raemx roengz cenj bae cimq, yaepndeu couh cimq ndaej cenj caz rang vamaedlaeh ndeu, baez cimz, feihdauh miz di diemz,haemq dwgbak, ndigah mwh gou simnyap seiz cungj aeu gwn amq he, gwn amq he le sikhaek gamjdaengz ndei haujlai. Gou gyaez caz vamaed- laeh lumj maz nei.

Baez ndeu, daxboh aenvih doxgaiq ra mbouj raen fatheiq, gou siengj, cimq cenj caz vamaedlaeh ndeu hawj daxboh gwn, simcingz de haengjdingh ndei hwnjdaeuj. Ndigah gou bae ra cenj, hoeng ra bae ra dauq cungj mbouj raen saek aen cenj, baenzlawz guh ne? Gou lwgda baez yaep, sikhaek naemj ok aen cawjeiq he. Gou dawz aen yezsuijbingz daeuj, cigciep ndingq mbawcaz roengzbae, yaepyet, gij mbawcaz lumj rox bienq mohsuz nei, baez di baez di bienq hung, yaepndeu couh youq ndaw bingz caenx dwk ndaetfwgfwg, lij miz geij duj vamaedlaeh hai dem. Gou dawz caz daengz dangqnaj daxboh, daekeiq faengfaeng dwk naeuz:“Daxboh, gou cimq gij caz neix, mwngz gwn amq ndeu, baujcingq mwngz heiq siu.”Daxboh ciep aeu aen cenj, baez yawj, cam:“Mwngz vihmaz dwk baenzlai mbawcaz, caen yaix ha!” Gou naeuz:“Gou hix mbouj siengj yaix, hoeng gou dauqcawq ra cenj mbouj raen, couh cigciep ndingq mbawcaz roengz bingz bae lo.” Gou caengz gangj sat, daxboh gaenq riuhaha hwnjdaeuj, ciep dwk de lwnh hawj daxmeh, daxmeh youh lwnh hawj daxgoeng daxbuz. Couh yiengh- neix, boux cienz boux, sawqmwh daengx aen ranz cungj rim singriu.

(Maj Huj)