Seizcin daeuj seiz, roeggacak youq gwnz go faex ceiq hungsang ndeu caux aen rongz ndeu, aen rongz de youh sang youh hung, youh gengmaenh youh gyaeundei, daihgya cungj hozhaenz dangqmaz, bouxboux haenh gij dinfwngz de ndei raixcaix.

Roeggacak haeuj ranzmoq bae youq le, youh mbin okbae gamz nyefaex ma gyaq youq gwnz nye faex sang henzgyawj bae, de lij aeu caux rongz dem. Roeglaej mbin gvaqdaeuj, naeuz:“Roeggacak dahcej, aen rongz mwngz gaenq ceiq hungsang ceiq lengj lo, mwngz vihmaz lij guh rongz dem ne?”Roeggacak riunyumnyum naeuz:“Lai guh aen rongz ndei ha.”

Rongz moq guh ndei le, roeggacak lij caengz dingz roengzdaeuj, youh caiq guh rongz moq. Roegga caiq hix yawj mbouj gvaq da lo, mbin gvaqdaeuj, naeuz:“Dou cungj rox mwngz guh rongz ak lo, mwngz lij aen youh aen guh baenzlai rongz miz maz yungh, baij aeunaj ma?”

Roeggacak cij riuriu, naeuz:“Lai guh aen rongz ndei ha.”

Yienghneix, roeggacak guh le geij aen rongz, aenaen cungj hungsang gengmaenh youh gyaeundei, caeuq aen rongz swhgeij youq haenx mbouj miz gijmaz mbouj doengz.

Seizdoeng daeuj lo, rumzbaek cihuhu. Ngoenz ndeu, aen rongz roegga deng rumz ci vaih doek roengzdaeuj lo. Roegga nit dwk saenzdedded, de ngiengx gyaeuj yawj giz mbouj gyae, gij rongz roeggacak lij lumj gungdienh nei gengmaenh gyaeundei, de geijlai siengj bae gizhaenx baexbaex rumz ndojndoj nit ha, hoeng, baez ngeix daengz swhgeij gaenq riu gvaq roeggacak, couh mbouj ndei eiqsei hwnjdaeuj lo. De cijndei ndwn youq gwnz nyefaex, suknyaennyaen cengqgengz dingj dwk. Raq rumz nit ndeu ci daeuj, roegga nyaenx mbouj ndaej “a” swenj sing ndeu.

Roeggacak ndoj youq ndaw rongz hunggvangq raeujrub, sawqmwh dingqnyi roegga swenj ndaej siliengz, de ndonj okdaeuj yawj, raen roegga ndwn youq gizhaenx saenzdedded, couh mbin gvaq- daeuj, bongx mbaq roegga naeuz:“Nit ba? Cingj haeuj ndaw rongz hoengq gou daeuj ndojndoj ba.”

Roegga dauqdaej miz rongz youq lo, lij dwg caeuq roeggakcak ityiengh youq aen rongz youh hung youh gyaeundei ne. Roegga gikdoengh dwk doiq roeggacak naeuz:“Docih mwngz, roeggacak dahnuengx.”

Seizdoeng gvaqbae, seizcin daeuj, haujlai roeg daj gizgyae mbin dauqma lo. Gyoengqde hainduj caux rongz, yaek faeg roeglwg.

Roegdinghgeng mbouj sug caux rongz, seizgan ngoenz youh ngoenz gvaqbae le, aen rongz de lij caengz caux ndei, da raen couh mbouj ndaej faeg roeglwg lo, de gip ndaej baenqlulu, saetmuengh dwk hemq:“Mbouj guh, mbouj guh lo!” Roeggacak mbin gvaqdaeuj, nai de naeuz:“Mwngz sien gag guh gonq, saedcaih guh mbouj baenz couh haeuj ndaw aen rongz hoengq gou bae faeg lwg ba.”

Roeggacak youhcaiq guh rongz moq lo, de lij aeu guh haujlai aen rongz dem, hawj engq lai doengzdoih cungj miz rongz daeuj dangj rumz gang fwn caeuq faeg lwg.

Roeggacak caen angq bang bouxwnq ha.

(Ganh Sozvwnz/甘说文)