Mbwn laep lo, dauqcawq cingxngaungau, mbouj miz saekdi sing vunz. Duznou ndoj youq ndaw congh, ngeng rwz dingqdingq le, siujsim sisi iet gyaeuj okdaeuj yawjyawj, baihrog congh di ngaeuz vunz ndeu hix mboujmiz, hoeng, de youh suk gyaeuj dauqma. De mbouj ndaej mbouj siujsim, aenvih ngamq haemhlwenz, de okdaeuj caeg gwn, ca di deng vunz moeb dai.

De youh saeqsim dingq le youh dingq, yawj le youh yawj, baihrog caen mbouj miz gijmaz doenghdanh, de cij ndonj okdaeuj yaemzyaemz.

Duznou youq ndaw ranz cienq doh le, gijmaz gwn cix mbouj miz, de haeb faenz haeb heuj ndaq:“Gij vunz rwix neix, gijmaz hix mbouj louz hawj gou gwn, lij moeb gou!” De gwj ndaq gwj huj, couh roengzrengz gaet gouh haiz henz ndang, lij youq gwnz haiz ok haex ok nyouh.

Duznou raih daengz laj yiemhroq, sawqmwh, “bug” sing ndeu, miz yiengh doxgaiq ndaem- ndat ndeu ca di dub deng gyaeuj de. De hwk ndaej din cungj unq liux, lawq yaephe, cij fatyienh yienzlaiz dwg duz vumzvauz ndeu.

Duznou din baez daemh, sing- daemq hongz:“Hwk dai gou lo, ca di dub deng gou!”

Vumzvauz naeuz:“Doiq mbouj hwnj, gou din in, haxbaenh, douh youq laj yiemhranz yietnaiq, mbouj siujsim doek roengzdaeuj lo.”

Duznou naeuz:“Mwngz vaiq ndoj hwnjdaeuj ba, mbouj nex, hawj vunz yawjraen couh dai lo.”

Vumzvauz naeuz: “Mbouj youqgaenj, gou miz fwed, haxbaenh doek roengzdaeuj mbouj dengsieng, cij dwg din in.”

Cingq gangj dwk, dahsau iq ndeu byaij gvaqdaeuj lo. Duznou baez raen, couh gag buet deuz lo. Vumzvauz siengj deuz, hoeng, din baez cengj, in ndaej hemq “aiyo” sing ndeu, de bek fwed geij baez hix mbin mbouj ndaej hwnjdaeuj.

Dahsau yawjraen le, byaij gvaqdaeuj. Vumzvauz lau ndaej swenj “cece”. Dahsau maeuq roengzdaeuj yawjyawj, gangj:“Vumzvauz ha vumzvauz, mwngz ngoenznaengz bang dou gaeb nonhaih, seizneix baenz gijmaz lo? Itdingh dwg dengsieng luba? Gou bang mwngz cat di yw ba.” Gangj dwk, song fwngz nep doiq fwed vumzvauz, dawz vumzvauz haeuj ranz bae.

Dahsau cazyawj raen din vumzvauz sieng le, couh ra yw daeuj siujsim daz gwnz din sieng de bae.

Dahsau menhmenh cuengq vumzvauz youq gwnz conghcueng bae, naeuz:“Baengzyoux hojlienz, mwngz couh ndeindei youq gizneix ciengxsieng ba.”Gangj sat, gven dou deuz lo.

Banhwnz, duznou youq rog gwn imq guhcaemz gaeuq le cij dauq, bakdou gven lo, de couh daj conghcueng ndonj haeuj ranz, youh fatheiq youq gwnz conghcueng ok nyouh ok haex. De fwt raen vumzvauz, vumzvauz gaenq ndei haujlai lo.

Duznou gamjdaengz gig geiz- gvaiq, cam:“Sou vumzvauz caeuq dou duznou maj ndaej doxlumj raixcaix, sou mboujgvaq lai maj doiq fwed he, rox mbin ndwi, vihmaz gyoengqvunz doiq sou baenzneix ndei, youh dauq yaek moeb dou dai bae ne?”

Vumzvauz naeuz:“Dou caeuq sou mbouj doengz, dou cij gwn nonhaih, coengzlaiz mbouj caeg doxgaiq vunz gwn, engq mbouj luenh haeb luenh gaet doxgaiq, bouxvunz lij dawz dou beij guh cungj fukheiq ndeu ne. ”

Duznou dingq le, najmong raixcaix, deuz yaemzyaemz lo.

(Ganh Sozvwnz/甘说文)