Gou dwg duz nou ndeu. Gou ciengzseiz naemj aen seiqgyaiq neix dauqdaej dwg baenzlawz yiengh ne? Seiz iq gou roxnyinh aen seiqgyaiq neix rim nditrongh. Hoeng riengz nienzgeij ciemhciemh hung, gou cij fatyienh cungj nditrongh neix gaenbonj mbouj gvihaeuj bang nou raeuz. Baeznaengz gou mbeihung dwk byaij daengz gwnz gai bae seiz, gyoengqvunz mbouj dwg hemqswenj couhdwg gip rin gveng gvaqdaeuj, mbouj ndonjdeuz vaiq nex couh deng moeb dai lo.

“Duznou gvaq gai, bouxboux hemq moeb.”Gou gaenq mingzbeg gij eiqsei gawq vah neix lo. De dwg gangj gyoengqvunz haemz bang nou raeuz. Gou caen mbouj rox cojgoeng raeuz cungj guh le gijmaz, yinxhwnj gyoengqvunz yienghhaenx haemz raeuz. Cojgoeng raeuz lauheiq dwg caeg gwn gij haeuxgwn gyoengqvunz, lauheiq dwg haeb gvaq gij buh dijbauj gyoengqvunz, louz aen mingzdaeuz mbouj ndei. Hoeng gij saeh neix cungj dwg goenggeq raeuz guh, caeuq bannomj raeuz mbouj miz gvanhaeh ha!

Gou itcig siengj guh duz nou cingqheiq、caencingz ndeu, caeuq vunz doxhuz youq. Hoeng vunz lij dwg lumj doenghbaez ityiengh yawj mbouj hwnj raeuz, haemz raeuz, miz mbangj vanzlij muengh cawzraeg raeuz. Neix doiq raeuz daiq mbouj goengbingz lo. Engq hawj gou gamjdaengz mbouj goeng- bingz dwg, gyoengqvunz gawqyienz yungh haujlai swz daeuj ndaq raeuz, gae raeuz, lumjbaenz“da lumj noucim”“da lumj noucaeg”daengj. Naeuz raeuz “da lumj noucim” yawj mbouj gyae. Gizsaed lwgda yawj mbouj gyae dauq dwg vunzloih sou, sou raemj faex lailai daihdaih, buqvaih vanzging: Hwnj gunghcangj lailai daihdaih, baiz ok raemxuq, hawj raemxdah bienq ndaem, yinxhwnj vanzging yakrwix raixcaix. Nanzdauh neix dwg yawj ndaej gyae ma? Naeuz raeuz “da lumj noucaeg”, raeuz maj ndaej miz di yakyawj, hoeng bang nou raeuz boux caeuq boux gig caensim, mbouj lumj sou guhgyaj, baez miz leih’ik doxdawz, couh ok luenh.

Vunzloih, sou rox lwi? Youq yihyozgai, raeuz mboujdanh dwg doxgaiq yenzgiu bingh, youh dwg“boux sawqniemh”niemh yw, yih- yozgyah youq gwn ndang raeuz sawq- niemh gak cungj yw, vih vunzloih dwkhingz gij bingh guh ok gunghawj hungmbwk. Gou maqmuengh vunzloih gaijbienq gij daidu doiq raeuz, gou saenq, mbouj yungh geij nanz, raeuz couh bienqbaenz baengzyoux ceiq ndei vunzloih.

(指导老师：潘文清)