Mbwk: Daengq beix geij yungh heiq,

Cuengq cibngeih diuz sim;

Nuengx daj saeq daengz hung,

Caengz deng vunz gangj gvaq.

Beix daengq coenz youh coenz,

Nuengx nyinhcaen goj geiq;

Daengq beix geij yungh heiq,

Cuengq cibngeih diuz sim.

Mbouj dwg gou gangjboq,

Ndwi byaij gvaq lohrumz;

Nuengx daj saeq daengz hung,

Caengz deng vunz gangj gvaq.

Sai: Suenq nuengx aeu simsaeh,

Ngoenzneix dauq daeuj caz;

Ndi soengq ndaej gijmaz,

Nuengx baema gaej gvaiq.

Caenndang byaij daeuj cunz,

Rox mwngz ndi lumz beix;

Suenq nuengx aeu simsaeh,

Ngoenzneix dauq daeuj caz.

Soengq nuengx daengz gizneix,

Beix gag uet raemxda;

Ndi soengq ndaej gijmaz,

Nuengx baema gaej gvaiq.

Mbwk: Ciuh neix mbouj miz fuk,

Nyapnyuk lae raemxda;

Hoz caengz siengj baema,

Ranz youh gaz lwgsaeq.

Mbouj un soengq gijmaz,

Raennaj sim cix cuk;

Ciuh neix mbouj miz fuk,

Nyapnyuk lae raemxda.

Bae daengz seiq daih’ngeih,

Caez nyinh geiq doxcaz;

Hoz caengz siengj baema,

Ranz youh gaz lwgsaeq.

Sai: Aenhoj gaej yungh gangj,

Aenvan gaej yungh lumz;

Guhdoih daeuj lajmbwn,

Caez doxcunz siuheiq.

Lwg yied ngoenz yied maj,

Nuengx naih caj umj lan;

Aenhoj gaej yungh gangj,

Aenvan gaej yungh lumz.

Dingj gvaq ciet daihhanz,

Mbouj nanz cix laebcin;

Guhdoih daeuj lajmbwn,

Caez doxcunz siuheiq.

Mbwk: Ndaej coenz vah duh beix,

Nuengx yied ngeix yied van;

Lwg hung cog hwnjbanj,

Miz man liux beixnuengx.

Baengh mehbaj Genzrumz,

Raeuz doxbungz ngoenzneix;

Ndaej coenz vah duh beix,

Nuengx yied ngeix yied van.

Rumzbaek liengzyaya,

Muengh daeuj ra rumznamz;

Lwg hung cog hwnjbanj,

Miz man liux beixnuengx.

Sai: Nyaenx nae baenz yiengzbo,

Nyaenx hoj baenz bohranz;

Nuengx camhseiz souh nanh,

Ngoenzvan youq baihnaj.

Seizlawz nuengx umj lan,

Beix daengx ranz bae hoh;

Nyaenx nae baenz yiengzbo,

Nyaenx hoj baenz bohranz;

Daeuhgyoet dauq hwnj hoenz,

Vacin hoengzbyambyam;

Nuengx camhseiz souh nanh,

Ngoenzvan youq baihnaj.(sat)