Haeujdiemj ndaej song ndwen lai nanz le, gij ganbu sedui cungj ndaej daengz le “gaijfang”. “Seiq cing” guh sat gaxgonq, cienmonz aeu duenh seizgan bae guh fukcaz. Gak benq caeuq swnghcanjdui cungj nyinhcaen guh fukcaz, fatyienh miz loengloek, sikhaek gaijndei gvaqdaeuj. Veiz Gozcingh caenndang ciuhai baez hoihnaenghdamz niemhsou ndeu, dingq gij ganbu sedui caeuq gij daibyauj binzyacunghnungz naeuz yigen hawj “seiq cing”. Doeklaeng, gij vunz miz ginghci vwndiz haenx, bouxboux cungj nyienh youq gij gwnz caizliu ciemcoh.

Veiz Gozcingh dingz cozfungh guh hong daj saehsaed okfat, haeujlaeg sijsaeq, nyinhcaen fucwz neix, caeuq dingz guhfap “coj” seizde hingq haenx gig mbouj doxdoengz. Gij anq “seiq cing” youq Liengzdungz dingh haenx, saehsaed cingqmingz dingj ndaej hwnj lizsij gaujyen.

Youq Liengzdungz guh hong “seiq cing” 9 ndwen nanz, Veiz Gozcingh cawz liux camgya vaisw hozdung、gij hoih youqgaenj caeuq bae gaijgez gij saeh gaenjgip haenx, itcig youq Liengzdungz maeuqdiemj. Miz baez ndeu, de lizhai Liengzdungz lai nanz di, baezde dwg youq bi 1964 ndwen 12 ndawcib daengz bi 1965 ndwen 1 ndawcib, bae Baekging hai Hoih Hong Cunghyangh caeuq Daihsam Gaiq Daengx Guek Yinzda Baez Hoih Daih’it. Youq gwnz hoih Daihseiq Gaiq Daengx Guek Cwnghez Baez Daih’it, de ndaej senj guh Daengx Guek Cwnghez fucujsiz.

Youq Liengzdungz, Veiz Goz- cingh caeuq gij bouxdoih wnq ityiengh, daj goek daengz byai cungj dangq bonjfaenh dwg boux vunz- guhhong bujdungh ndeu bae camgya cizdij guh hong. Daj ndaem goho、ndaem gofoed、cousou、rom bwnh、guh suijli、ndaem faex caux ndoeng daengz cingeng、ndaem gyaj、ndai naz, sojmiz gij hongnazreih, de cungj camgya gvaq lo.(caengz sat)