(ciep geiz gonq)

Dahyungz haeuj ranz guhbawx le, haidaeuz song meh bawx cungj ndei gangj. Caezgya youq nanz le, mauzdun yied daeuj yied lai. Mehlungz yiemz yienghneix yienghhaenx, ngoenzneix naeuz lwgbawx cawj haeux mbouj cug, ngoenzhaenx naeuz cawj byaek dwk gyu lai, song boux cungj mbouj haisim, doeklaeng gag boux gag cawj gwn, song meh bawx lumj ma caeuq meuz ityiengh, boux raen boux mbouj ndaej, boux dongx boux mbouj han.

Daeglungz gap youq cungqgyang mehyah caeuq daxmeh, lumj duznou youq ndaw fungsieng, song gyaeuj souhheiq, haeuj baih lawz goj mbouj baenz. Daeglungz seizseiz cungj siengj ra gihvei hawj mehyah caeuq daxmeh doxndei, aen gihvei neix daeuj daengz lo, ngoenz ndeu, Daeglungz doiq mehyah naeuz: “Raeuz dwg najlwg, daxmeh danghnaeuz guh maz mbouj deng, mwngz couh lai bauyungz lai yienzliengh de, gaej geiq coq sim. Ngoenzrawz dwg ngoenzseng daxmeh, mwngz bang de banh baez ngoenzsang ndeu, hawj de sim’angq, hawj de rox daengz mwngz gyaez de, mwngz aeueiq de.” Dahyungz naeuz: “Ndei, cijaeu daxmeh mbouj yiemz gou, daengz ngoenzseng de gou daeuj cawj haeux cawj byaek.” Daengz ngoenz- seng daxmeh, Dahyungz dawz ndaw ranz baet ndaej seuqsaksak, daengz seiz gwn caeuz, de baij aen daiz ndeu youq henz daizhaeux, diemj aen daeng ndeu, dawz aen gaugyaeq baij hwnj gwnz daiz, dawz lab baek youq gwnz gaugyaeq, yienzhaeuh caiq bae nyaengq hong wnq. Daeglungz heuh daxmeh okdaeuj gwn haeux. Daxmeh baez raen aen gaugyaeq hung lumj aen ndoengj gwnz daiz neix, youh miz dangz miz bingj, doeksaet liux bae, youh sim’ angq raixcaix. Daxmeh naeuz:“Ciuhvunz geq daengz neix, mbouj caengz guh saek baez ngoenzseng gvaq, ngoenzneix dwg baez daih’it lo. Daeglwg mwngz rox hauqswnh daxmeh, daxmeh sim angq lai lo.” Daeglungz naeuz:“Daxmeh, aen gaugyaeq gyaeundei youh rang- fwdfwd neix dwg bawx mwngz bae dingh guh ne.” Seizneix, Dahyungz youh bae hai densi, seiz daengz roek diemj cung, ndaw yienh densidaiz boyinhyenz ok gwnz bingzmu densi daeuj boyinh naeuz:“Baihlaj dwg Dahyungz diemj diuz go hawj yahbuz de gvaq ngoenzseng, diuz go nduj dwg 《Hoh Mwngz Ngoenzseng Vaiqvued》.” Ciep daeuj couh langh yinhyoz. Dahyungz ganjnyaengq diemj lab, riengz yinhyoz ciengq go hwnjdaeuj, Daeglungz caeuq Dah- yungz doq bek fwngz doq ciengq go “hoh mwngz ngoenzseng vaiq- vued……”, ciengq sat le hawj daxmeh boq lab. Boyinhyenz youh naeuz: “Diuz go daihngeih dwg 《Gwnzbiengz Cijmiz Daxmeh Ndei》.” Yinhyoz youh hoengz hwnjdaeuj, song gvanbaz youh riengz yinhyoz ciengq go. Ciengq go sat le, Dahyungz gvej gaiq gaugyaeq cuengq ndaw bat, song fwngz ndenq hawj yahbuz, yahbuz ciep aeu gaugyaeq seizde, raemxda sawqmwh lae roengzbyoegbyoeg.

Daj seizhaenx hwnj, daxmeh cij rox lwgbawx ndei, lwgbawx hix rox daxmeh mbouj yungzheih. Song yah bawx doxgiet doxgyaez, daengx ranz vunz doxhuz doxndei, vuenyungz dangqmaz.

(sat)