Hwnj dangz yijvwnz seiz, lauxsae youq ndaw ban naeuz bien faenzcieng gou ndaej fatbiuj lo, lij dawz bonj cazci daeng bien faenzcieng gou haenx daeuj hawj gou. Gig mbouj yungzheih ngaiz daengz cuengqhag, gou gaem bonj cazci angqfaengfaeng buet ma ranz. Baez haeuj dou, gou lienz daehsaw cungj mbouj cuengq roengz, cigciep cung haeuj ranzsaeuq bae. Daxmeh daengx gij hong ndaw fwngz, doeksaet dwk yawj gou. Gou sikhaek dawz bonj cazci ndenq daengz dangqnaj daxmeh, dajhai le vix diuz coh gou hawj de yawj, gwnz naj daxmeh sawqmwh riunyumj faengfaeng, gij riu haenx hawj gou vuenyungz dangqmaz.

Ngoenz he banringz gvaq, gij ndit henjgim ciuq gwnz dingj gyauyozlaeuz, yawj bae ronghsagsag, hoeng sim gou naekgywggywg. “Baenzlawz guh ne? Yijvwnz ngamq gauj ndaej 89 faen.” Yawj mbaw gienj geiz sat gaujsi, gou doeknaiq yaek dai, neix dwg gou baez daih’it gauj baenz ca.

“Baujboiq, gauj ndaej baenzlawz yiengh?” Ngamq yamq haeuj bakdou ranz, daxmeh couh gvensim dwk cam. Gou ngaem gyaeuj dwk, gazdwddwd naeuz:“Ngamq……ngamq gauj ndaej 89……” Gou lumj nyaenj yazgauh neix, cengqgengz caenx gij vah mbouj baenz coenz neix okdaeuj. Gou laihnaeuz daxmeh rox ndaq gou can ndeu, mbouj siengj daengz daxmeh dauq riu lo.

“Baujboiq ha, mbouj youqgaenj law.” Daxmeh doq riu doq naeuz, “baez neix gauj mbouj ndei, lij miz baez laeng, ngoenzlaeng gij gaujsi lij lai ne.”“W, baezlaeng gou itdingh gauj ndei.” Gou giendingh dwk naeuz, “hoeng, daxmeh, mwngz vih maz mbouj gvaiq gou ne?”“Gvaiq mwngz miz yungh lwi? Cingzcik dwg aeu roengzrengz cij ndaej daeuj, daxmeh siengsaenq mwngz cijaeu roengzrengz di he, couh gauj ndaej ndei, gyayouz bw!” Daxmeh lij riu yienghgaeuq, gij riu haenx lumj rumzcin nei raeujrubrub……

Gij riu daxmeh youq ndaw sim gou ciengxlwenx dwg duj va he, duj va ceiq gyaeundei he.

(roek nienzgaep Vuz Yezfanz)