Mbwn nit raixcaix, hek haeuj diemq gwn haeux ndoet laeuj noix haujlai lo, laujbanj ngeix mbouj ok gijmaz banhfap ndei daeuj sawj aen diemq seng’eiq hoengh hwnjdaeuj.

Doek nae lo.

Haetcaeux, masaeceij nduek bouxcawj iq ndiu lo.

Baez hai dou nae nanwtwt hausaksak, daengngoenz hoengzfetfet, ndit gyojgyatgyat.

Bouxcawj iq caeuq gyoengq lwgnyez doih vax nae daeuj hoenx- ciengq、doi vunznae, masaeceij bang bouxcawj iq maranz gamz aen lwgbaeg nding daeuj cap guh aen ndaeng vunznae, vunznae sikhaek lumjlili gyaeundei hwnjdaeuj. Laujbanj raen le hix youq najdou swhgeij doi duz saeceij nae hung ndeu.

Lwgnyez dawz mauh hoengz hawj vunznae daenj, dawz daengloengz hoengzfetfet caeuq bauqrangh cug gwnz bien bae, cap youq ndaw fwngz vunznae bae. Yienghneix nding caeuq hau dox ingj yienhyanyan, gyaeugywt- gywt, lij yienj ndaej angqvauvau. Laujbanj yawjraen le, sim baez doengh, dawz aen diemq gaij baenz diemq hojgoh, youq naj dou diemq venj hwnj baiz daengloengz moqyatyat ndeu, diemj bauq raezrangrang daeuj angqhoh, yiengj bibi baba.

Vunzhek yied daeuj yied lai, aen diemq hojgoh seng’eiq hoenghhwd- hwd lo.

Vunz bae vunz dauq, yawj raen duz saeceij nae cungj haenh:“Duz saeceij neix geijlai gyaeundei ha!” “Duz saeceij neix geijlai vifung ha!”Laujbanj daengq yenzgungh naeuz: “Duz saeceij neix caen dwg duz fuk ndeu, itdingh aeu hen ndei, miz de seng’eiq couh ndei lo!” Duz saeceij nae dingq le gig ndaenggon.

Haet neix, bouxcawj iq daiq masaeceij caeuq bouxhung daeuj gwn hojgoh. Masaeceij riengjret gaen dwk bouxcawj buet gvaq henz ndang saeceij nae, daengz bakdou, bouxcawj iq lij umj masaeceij hwnjdaeuj byaij haeuj ndaw diemq bae.

Duz saeceij nae yawj mbouj gvenq, ndaw sim gag hoed:“Hw, begbeg maj ndaej yiengh lumj saeceij, cij rox guhmbenj, baenzlawz miz di yungh ndeu!”

Bouxcawj gwn hojgoh, ndek di ndok hawj masaeceij. Masaeceij gamz ndaek ndok ndeu ok rog daeuj guhcaemz. Saeceij nae liuq da he le naeuz:“Hw, caen dwg miz gijmaz bonjsaeh couh ndaej gwn gijmaz doxgaiq! Duz yaez cij ndaej gwn ndok lw!”

Masaeceij doeksaetyat, han naeuz:“Bouxcawj gwn noh, gou heuj raeh gwn ndok, miz maz geizgvaiq?”

“Mwngz cij dwg duz ma iqetet ndeu, mbouj dwg duz saeceij ndeu, lij gamj cang lumj gij yienghceij saeceij dou!”

Masaeceij najhoengz lo, naeuz: “Gou yienzbonj couh maj baenz yienghneix, mbouj dwg cangbaenz.”

“Dawz gij bwn mwngz raed liux bae, mbouj hawj mwngz lumj yiengh dou!”

Masaeceij mbouj fugheiq, naeuz: “Gou bonjlaiz couh maj yienghneix, vihmaz mbouj ndaej lumj yiengh swhgeij ne?”

“Mwngz miz gijmaz bonjsaeh gijmaz swhgwz lumj saeceij? Duzma couh dwg duzma, lij heuhguh ‘masaeceij’? Mbouj ndaej heuhguh ‘masaeceij’!”

Masaeceij raen saeceij nae akbaq lai, swt cix mbouj caiq swt de.

Daengngoenz yied benz yied sang, ndit yied daeuj yied raeuj, saeceij nae hanh lae han roenx, ciemhciemh yungz lo. Daengz seizneix, de cij rox, swhgeij mbouj dwg saeceij caen.

（甘说文）