Daj“Lajmbanj Cinghseuq, Vujmingz Gyaeundei” hozdung haiguh doxdaeuj, lajmbanj fatseng bienqvaq gig hung. Aen hagdangz raeuz hix mbouj laehvaih, yienghsiengq moqsaksak. Vih dawz gunghcoz guh ndaej engq ndei, yozyau laebbaenz aen“hungzlingjginh genhduz siujcuj”ndeu, cujyau fucwz genjcaz gij hingzveiz gveihfan gyoengq doengzhag. Lingjdauj faen raeuz baenz haj aen siujcuj, moix aen cuj haj boux cwngzyenz, gou dwg cujcangj cuj daihngeih. Gou rox, lingjdauj dawz aen yinvu neix gyau hawj raeuz, dwg saenq raeuz, lienh bonjsaeh guenjleix raeuz. Ciep ndaej aen yinvu neix, gou roxnyinh gig gvanghyungz. Gou amq roengz gietsim: Mboujguenj bungz gijmaz gunnanz, itdingh dawz gunghcoz guh ndei!

Aenvih raeuz dwg cuj daihngeih, ndigah baeznaengz singhgiz ngeih raeuz couh cizbanh. Banhaet, raeuz cungj yaek beij bouxwnq hwnq vaiq, caeux di daeuj yozyau. Daeuj daengz yozyau, raeuz couh daiq ndei biuhci, dawz dwnghgibiuj, ndwn youq gwnz roen rog yau cizyiz. Seizneix, raeuz couh lumj gyauhgingj youq gwnz goengloh cizginz ityiengh, naj daiq riunyumj yawj gyoengq doengzhag caeuq lauxsae daeuj yozyau. Raeuz nyinhcaen cazyawj, yawjraen miz doengzhag luenh gveng nyapnyaj roxnaeuz daenj haizdaz daeuj yau, raeuz cungj geiq roengzdaeuj. Linghvaih raeuz lij genjcaz cinghgez cwzyingih ndaw yau caeuq gyausiz veiswngh. Banringz cuengqhag, raeuz youq gwnz cauhcangz cizyiz, genjcaz gyoengq doengzhag baizdui bae lingx yingzyangjcanh cingzgvang. Banringz dauqma yozyau caeuq cuengqhag caeuz, raeuz ciuqciengz lumj banhaet ityiengh cizbanh genjcaz, doeklaeng dawz dwnghgibiuj cingjleix ndei gyau hawj cizcouhyenz cij suenq vanzcwngz yinvu. Yienghneix cizcouhyenz couh baengzgawq gij biuj neix guh cungjgez, ndei couh haenh, mbouj ndei couh gaeu faen ndaw ban, lij bihbingz、gyauyuz.

Ginggvaq bi lai roengzrengz, gij hingzveiz gyoengq doengzhag engq gveihfan lo. Yawj gij saek naj doengzhag, dingq gij vahhaenh lauxsae, gou rox, gij yinvu raeuz guh ndaej ndei lo. Mbouj guenj fwn geijlai hung, ndit geijlai haenq, raeuz ngoenzngoenz genhciz. Hangh yinvu neix yienznaeuz sinhoj, hoeng raeuz roxnyinh gig gvanghyungz. Vih yozyau engq gyaeundei, ranzmbanj engq cinghseuq, caiq haemz caiq hoj hix dij lo.

(指导老师：潘文清)