Ngoenzneix, lauxsae buci hangh cozyez daegbieb ndeu, heuh dou hag guh gienh hongranz ndeu. Gou gietdingh hag guh makyungz cauj gyaeq.

Banngoenz, gou caj mbouj gib daep dox, daj ndaw binghsiengh dawz song aen gyaeqgaeq caeuq aen makyungz ndeu okdaeuj. Riengzlaeng gou dawz makyungz swiq ndaej seuqsatsat, gaem caxbyaek dawz makyungz ronq baenz ndiq hung iq mbouj doxdoengz. Aenvih dwg baez daih’it guh, fajfwngz gaem caxbyaek gig ndaet. Yienzhaeuh, dawz gyaeqgaeq roq haeuj aen heng baez, aen gyaeq gauz lo, caiq siujsim sisi dwk dawz byukgyaeq mbek baenz song mbiengj, gyaeqhau gyaeqhenj lumj lwgnyez maqmuengh swyouz ityiengh sikhaek cung roengz ndaw vanj, gou caiq gya di gyu ndeu, yungh dawh gyaux, ciemhciemh gyaeqhau gyaeqhenj yungzhab itheij, lij ok haujlai bop iq dwggyaez. Gyaeq gyaux ndei lo.

Gou dawz rek cuengq hwnj gwnz saeuq, diemj feiz, duj feiz lamzsumsum lumjdwg cingq vih gou gyayouz ityiengh, angqfwng riz daej rek. Yaepndeu rek couh ndat lo, caiq dwk youz roengz rek bae, menhmenh couh mauh ok hoenz- heu, youz youq ndaw rek ok haujlai bopiq, doeklaeng youh menhmenh sanq deuz lo. Bop siu le, youz hix gaenq cawj ndei, gou din fwngz luenh dwk dawz gij gyaeq raix haeuj ndaw rek, “cw cw cw”, gyaeq sikhaek youq ndaw rek goenj hwnjdaeuj, bongz hwnj haujlai aen bop- hung henjgim, gig vaiq bienqbaenz bingjgyaeq henjgim, lumj aen daeng- ngoenz ityiengh. Gou yungh canj dawz bingjgyaeq cab baenz gaiq iq, fan mbouj dingz, doeklaeng dawz makyungz ronq ndei haenx raix roengzbae, gya di gyu, ndaw rek fat ok singyaem “ sw sw sw”, lumj dwg yenjcou souj go ndeu. Raq heiqhom makyungz gyaux gyaeq mbin haeuj ndaeng daeuj.

Gou nip gaiq iq cimz le,“w, mbouj ndaengq hix mbouj cit, caen ndeigwn!” Faenh makyungz cauj gyaeq couh guh ndei lo. Gou daek haeuj ndaw deb, gij heiq hom dawz daengx ranz vunz cungj yinx gvaqdaeuj, gyoengqde mwngz gaemz gou gaemz, cimz dwk, daihgya cungj haenh gou cawj ndaej caen ndeigwn.

Gou caegcaeg riu lo, aenvih gou cimz daengz gij angq guhbaenz saeh.

( 指导老师:彭君星 )