Ninz youq gwnz diegnywj unqnemnem, diem hoengheiq singjsangj, dingq singgo gyaeundei daswyenz, ciemhciemh dwk, gou lumz bonjfaenh, lumz aen seiqgyaiq dangqnaj, caeuq daswyenz yungz baenz benq ndeu, baenz daswyenz ndawde boux ndeu——go’ndoek.

Daeuj daengz aen seiqgyaiq geizheih neix, dangqnaj benq ronghsag ndeu: Henz ndang gou miz haujlai beixnuengx, boux daemq boux sang, boux biz boux byom, caezgya vuenyungz dwk swnghhoz youq gizneix. Gou iet hoz coh baihnaj yawjbae, henzgyawj gou miz diuz dah’iq sawdikdik ndeu; dah’iq mbiengj haenx dwg benq naz gvangqyubyub、 heusausau he, raq rumz ndeu boq gvaq, fan hwnj baenz caengz baenz caengz langhheu, gingjsaek gyaeundei raixcaix!

Gou cingq yawj dwk maez bae, sawqmwh dingqnyi laj din miz singyaem. Gou ngaemgyaeuj baez yawj, cijraen bang moed ndeu cingq simgaenj dwk byaij bae byaij dauq, lumj miz maz saeh gaenjgip nei. Gvaq yaephe, duz moed loq iq ndeu sawqmwh naengh roengz doem bae siengsim dwk daejnga’nga hwnjdaeuj, geij faen cung cungj mbouj dingz roengzdaeuj. Seizneix doengzdoih de engq simgip lo. Gou saedcaih nyaenx mbouj ndaej lo, hai bak cam：“Duzmoed, sou ndei! Yawj sou yienghneix gaenj, dwg mbouj dwg bungzdaengz gijmaz saeh nanz ne?”Duz moed hung ndeu han：“Bonjlaiz ngoenzneix dou siengj bae doenghnaz youz, hoeng diuz dah neix laengz roen, mbouj miz banhfap gvaqbae. Dou vih bae youz cinjbi haujlai ngoenz lo.”Dingq gij vah de, gou gietdingh bangcoh gyoengqde. Seizneix, gyoengq beixnuengx gou hix veiz gvaqdaeuj nai：“Gaej daej lo, sou hix mbouj yungh simgip, dou bangcoh sou.”Gangj sat, dou gak boux gak daj gwnz ndang bonjfaenh mbaet mbaw faex ndeu roengzdaeuj cuengq haeuj ndaw dah bae, hawj bang moed naengh hwnjbae dohgvaq dah’iq lo. Bangmoed benz hwnj hamq, riu coh dou diemzsisi. Gou vadvad fwngz, hemq naeuz：“Hoh sou vaiqvued……”

Gou lij siengj hemq：“Dauqma seiz dou caiq doh sou gvaq dah!”Lij caengz hemq ok bak, sawqmwh doeksaet singj lo. Gij cingzgingj ndaw fangzhwnz caen geizheih ha! Seiqgyaiq go’ndoek caen hawj gou louzlienh.(指导老师：潘文清)