Vah bouxbien编者按

Vihliux hawj gyoengq doengzhag roengzdangz le miz lai cungj saw Sawcuengh yawj, ndaej hag lai di Sawcuengh cihsiz, daj geiz neix hwnj, bonj banj hainduj laebdaeb bienfat “goj lwgnyez”, gyoengq doengzhag, sou yawj le dangh- naeuz miz maz siengjfap cingj sij saenq naeuz hawj dou, danghnaeuz sou hix siengj sij “goj lwgnyez”, cingj sij le geiq daeuj hawj dou, dou yaek dawz gij sij ndaej ndei haenx daeng okdaeuj hawj vunzlai yawj.

Doenghbaez, lajmbwn mbangj giz ngoenz gwn geij donq haeux, mbangj giz cib ngoenz buenq ndwen cij gwn donq ndeu; miz vunz ngoenz guh haemh ninz, miz vunz haemh guh ngoenz ninz.

Goengmbwn siengj hawj vunz dingh doxdoengz bae, couh heuh lajfwngz hemq Gyapdiet cienghginh daeuj lingx minghlingh.

Gyapdiet cienghginh daeuj lo. De hungsang cangqcwt, naengnoh ndaem youh ndongq, gwnz ndang aemq fan gyap diet ndaemndwt genggywt. De yawjyawj seiqlengq, ndawsim gag ndaenggon:“Hw, daengx ciengz mbouj miz saek boux beij de baenzmbauq vifung!” De cingq daekeiq fwngfwng, Goengmbwn doiq de roengz mingh- lingh, naeuz:“Gyapdiet cienghginh, mwngz sikhaek dawz minghlingh soengq daengz lajmbwn bae, hawj gyoengqvunz dingh ndei: Banngoenz guhhong, banhaemh yietnaiq, sam ngoenz gwn donq haeux ndeu. Itdingh aeu gyoengqvunz cungj ciuq gij gvidingh neix daeuj gwn haeux yietnaiq guhhong, mbouj ndaej caiq luenh lo!”

Gyapdiet cienghginh baez dingq, couh sikhaek bongx aek baujcingq guh ndei.

Gyapdiet cienghginh mbin daengz lajmbwn, ra raen bouxdaeuz gyoengq- vunz, minghlingh:“Goengmbwn minghlingh: Banngoenz guhhong, banhaemh yietnaiq, ngoenz gwn sam donq haeux. Itdingh aeu ciuq gij gvidingh neix daeuj gwn haeux yietnaiq guhhong, mbouj ndaej caiq luenh!”

Gwnzmbwn ngoenz ndeu, laj- mbwn sam bi. Gyoengqvunz cungj ciuq gij “gvidingh Goengmbwn”Gyapdiet cienghginh soengq daeuj neix guhhong、yietnaiq、 gwnhaeux, cungj mbouj gamj luenh, gig vaiq couh gvenq lo. Hoeng, aenvih gwn lai gwn deih, ok haex ok nyouh hix lai hix deih, daengx biengz cungj haeungaungau.

Heiq haeu oenq daengz gwnz- mbwn, Goengmbwn nyaenx mbouj ndaej lo, couh baij lajfwngz bae cazyawj. Boux bae cazyawj dauqma bauq le, Goengmbwn huj swenj “daiq Gyapdiet cienghginh daeuj”.

Goengmbwn hongz Gyapdiet cienghginh:“Mwngz dauqdaej soengq minghlingh daengz lajmbwn caengz?”

Gyapdiet cienghginh naeuz:“Gou ciuq mwngz minghlingh gyoengqvunz: Banngoenz guhhong, banhaemh yiet- naiq, ngoenz gwn sam donq haeux. Itdingh aeu ciuq gij gvidingh neix daeuj gwn haeux yietnaiq guhhong, mbouj ndaej caiq luenh!”

Goengmbwn hujdengdeng naeuz: “Boux vunz sam ngoenz gwn donq ceiq ngamj, mwngz dauq gag minghlingh gyoengqvunz ngoenz gwn sam donq! Seizneix gyoengqvunz gaenq sibgvenq lo, nanz gaij lo! Mwngz cienz minghlingh loek couh aeu fucwz, mwngz roengz lajmbwn bae doi haex goemq ndei, ciuhlwg ciuhlan ceih haex, mbouj hawj heiq haeu lah vunz baenz bingh!” Gangj sat fwngz baez vad, dawz Gyapdiet cienghginh bienqbaenz duz nengz hung ndeu.

Gyapdiet cienghginh mbouj gamj lawq, sikhaek mbin roengz lajmbwn daeuj. De aeu gyapdiet hen ndang, mbongq congh, gungq haex baenz ndaek, roux haeuj congh bae, gunx namh moek hwnjdaeuj, haex mbouj liux hong mbouj duenh.

Seizneix, vunz lajbiengz lij sibgvenq ngoenz gwn sam donq, lwglan Gyapdiet cienghginh lij nyaengq ceih haex. Daihgya heuh gyoengqde guh “mbongjmbwt”、 “nengzmbwt”, hix miz lwgnyez heuh gyoengqde “Gyapdiet cienghginh”.

（Ganh Sozvwnz/甘说文）