Mbwk: Guhdoih daeuj lajmbwn,

Mbouj un gamj fouqgviq;

Guh sam mbouj baenz seiq,

Lumj byaleix gungx dan.

Guhmaiq mbouj baenz maiq,

Loek vaih youq gyang cin;

Guhdoih daeuj lajmbwn,

Mbouj un gamj fouqgviq.

Caih hongrog hongranz,

Cungj gag fanz gag heiq;

Guh sam mbouj baenz seiq,

Lumj byaleix gungx dan.

Sai: Beij ndawbiengz cix soeng,

Beij ndaw doengh cix lumz;

Sinhoj mbouj gag mwngz,

Lajmbwn cungj miz doih.

Aenndei coq lajswiz,

Aenrwix vit ndaw gumz;

Beij ndawbiengz cix soeng,

Beij ndaw doengh cix lumz.

Liujcouh ndwedsaengsaeng,

Boux gai raemx gai fwnz;

Sinhoj mbouj gag mwngz,

Lajmbwn cungj miz doih.

Mbwk: Haemh siengj doz youh doz,

Sinhoj caengz youh caengz;

Gonq nuengx siengj mbouj daengz,

Gyoh ciuhvunz mbouj liux.

Dwen vunz nuengx hix vunz,

Daeuj lajmbwn vang loh;

Haemh siengj doz youh doz,

Sinhoj caengz youh caengz.

Nyienh dai hoz mbouj gat,

Aj bak raemxda roengz;

Gonq nuengx siengj mbouj daengz,

Gyoh ciuhvunz mbouj liux.

Sai: Gwnz bya faex ndaemgyaemq,

Miz go daem go sang;

Gaej doeknaiq simfanz,

Cungj miz hanz bouj sawq.

Go’mak youq henz ranz,

Miz aen van aen haemz;

Gwnz bya faex ndaemgyaemq,

Miz go daem go sang.

Gaej doeng siengj sae ngeix,

Aeuqheiq cix vaih ndang.

Gaej doeknaiq simfanz,

Cungj miz hanz bouj sawq.

(6)