Raeuz aen gunghcozdui Liengz- dungz, aeu daj saedsaeh gizneix bae guh, miz maz vwndiz cix gaijgez maz vwndiz. De daez le sam aen iugouz hawj gunghcozdui: Daih’it, aeu lai lienzhaeh vunzmbanj, lai caeuq ganbu baedauq, caeuq vunzmbanj caemh gwn caemh youq, caemh guh hong, ra saek boux vunz daeuj naenghdamz, caenhvaiq liujgaij cingzgvang; daih- ngeih, fatdoengh vunzlai aeu ra saek boux doxging couh baenz, gaej gaenj lai. Seizneix, gihcwngz ganbu lau gunghcozdui, lau raeuz mbouj ciuq saedsaeh bae gangj, lau raeuz dingq rumz couh dwg fwn, lau raeuz luenh cingj、luenh daeuq gyoengqde. Raeuz itdingh aeu laeb gauhdu cwngci cwzyinganj, haeujlaeg sijsaeq diucaz ngeixyaeng, loengh cingzgvang seuq bae, mbouj saenq mbiengj ndeu; daihsam, “seiq cing” caeuq guh hong nazreih aeu doengzseiz gaem ndei, guh hong nazreih souh geiqciet hanh, mbouj ndaej nguh, raeuz boux mbouj rox hong nazreih haenx, aeu yiengq vunzmbanj hag, hawj duigan anbaiz hong, raeuz bae gamduk.

Haeuj diemj mbouj ndaej geij nanz, couh daengz ngoenzciet bet nyied cibngux. Seizde, gij gungh- cozdui diegrog gimq guh di saeh, lumjnaeuz youq ranz ginzcung mbouj ndaej gwn noh, bae haw mbouj ndaej gwn faenj daengjdaengj. Mbangj boux daezok, danghnaeuz cawjranz gvaq ciet dem byaek, gyoengqde baenzlawz guh? Gwn le lau famhloek, mbouj gwn youh lau duetliz ginzcung. Fanjyingj cingzgvang neix hawj Veiz Gozcingh le, de naeuz:“Raeuz youq ranz vunzmbanj “sam caemh”, gyoengqde gwn gijmaz, raeuz cix gwn gijmaz, raeuz aeu aeueiq ginzcung gvaq ciet sibgvenq, gyoengqde gya byaek, raeuz caemh caez gwn, dangngoenz lai hawj haj gak ngaenzbyaek couh ndaej lo, gaej hawj ginzcung gwnvi. Bae haw banhsaeh, dungx iek le, gwn vanj faenj mbouj suenq dwg famhloek, hoeng seizbienh bae ndaw diemqlaeuj gwn laeuj, couh mbouj cinj lubw.” De youh giengzdiuh naeuz, boux gunghcozdui aeu gwn ndaej haemz dingj ndaej hoj, aeu lai lienzhaeh ginzcung, souj gij souj fap, hengzguh cwngcwz, guh buengjyiengh ndei hawj ginzcung.

(caengz sat)