Ngoenznaengz seizneix, gou dingzlai cingq caeuq doengzdoih dwkgiuz. Hoeng seizneix, baihrog gyoengqvunz dwkgiuz hoenghhubhub, gou cix gven dou youq ndaw bangunghsiz, gag bouxdog, youzcaih raemxda doekbyoegbyoeg. Caen siengj mbouj daengz ha, couh youq haxbaenh, gou ngamq sou ndaej fung saenq Lozlauj, naeuz sou ndaej bonj saw gou geiq hawj de haenx, caemhcaiq docih gou hawj simnyienh gyoengqde ndaej saedyienh, lij daengq gou fuengbienh seiz bang de camndei song boux laux doengzhag de:Banh lauxsae caeuq Vuz lauxsae. Hoeng Lozlauj ha, mwngz cix mbouj rox, cingq youq haxbaenh, gou ngamq sou ndaej siusik rox Vuz lauxsae mbouj youq lo!

Geiq ndaej youq bi’gyai, gou biensij bonjsaw《Angq Hag Sawcuengh》seiz, bae ra Vuz lauxsae, cam de rom mbouj rom miz gij go lwgnyez, danghnaeuz miz lai, ndaej romcomz baenz bonj saw ndeu couh baenz lo. Seizhaenx Vuz lauxsae naeuz miz mbouj lai, caenh miz saek song diuz. Hoeng bi’gvaq miz ngoenz ndeu, raen de youq henz huz byaij, gou couh bae caeuq de gangjgoj. De naeuz gou sij gij faenzcieng daeng youq 《Sam Nyied Sam》 caeuq 《Minzcuz Bau》 haenx, de caemh yawj gvaq, miz gangj mingzcoh Bouxcuengh caeuq fungsug Vahcuengh Bouxcuengh daengj, caiq gya geij bien de sij caeuq Lozlauj Banhlauj sij haenx, ndaej gyoebbaenz bonj saw ndeu lo.

Yienghneix gou couh heuh de fukyaenq gij faenzcieng gyoengqde sij haenx, caeuq duhgou geij bien baez doxgyoeb, caen ndaej bonj saw ndeu dahraix. Doenggvaq lai fueng roengzrengz doxbang, gyauyuzdingh doengzeiq youz Gvangjsih Minzcuz Cuzbanjse cuzbanj, bonj saw neix heuhguh《Mizyinx Lwnh Vahcuengh》. Bonjlaiz, gou caeuq Vuz lauxsae doxyaeng, anbaiz youq gwn saw sij bouxlawz guh cawjbien、 fouqcawj- bien, de cix naeuz， sij gou bouxdog guh bouxcawjbien, de sam boux bouxlaux guh biensij couh ndaej lo. Yienghneix, gou couh mbouj caiq caeuq de doxeuq baenzlai lo.

Couh yienghneix, gij faenzcieng sam boux de sij haenx, miz haujlai gozci yinhbyauh, cungj dwg gou cug cih cug cih dwk haeuj ndaw dennauj, caeuq gij faenzcieng gou gyonj baenz bonj saw ndeu, ginggvaq cingjleix, cij gyau hawj cuzbanjse. Cuzbanjse yaenq ok yienghgauj, ma dou youh gaij haujlai. Ngeihgauj dawz ma seiz, gaenq yaek daengz bineix ndwencieng.

Gvaq cieng gaxgonq, gou dawz gauj bae hawj Vuz lauxsae, hawj de caiq mbat yaudui gij faenzcieng gyoengqde sij haenx lij miz loek dem lwi. Gvaq cieng le, de angqvauvau dawz daeuj hawj gou. Gou caiq daj goek daengz byai yawj mbat ndeu le, couh soengq bae hawj cuzbanjse lo.

(caengz sat)