Gwn haeuxcaeuz sat le, raeuz youh daengz dieg guh- angq bakmbanj bae guhcaemz. Va, gizneix gaenq miz haujlai vunz lo, gyoengq daxbuz comz youq itheij lwnhgoj; bouxsai cingq dwk geizciengh; daxmeh caeuq mehbaj、mehsimj cinjbi diuqfoux. Gij yinhyoz《Yied Daeuj Yied Ndei》yiengj hwnjdaeuj, geijcib vunz diuq hwnj gvangjcangzvuj, cezcou dwg yienghhaenx soengswt, dungcoz dwg yienghhaenx gyaeundei. Raeuz hix riengz gyoengqde diuq hwnjdaeuj. Diuq souj ndeu sat le, cik ga gou miz di naet lo. Gou naengh youq henz, yawj gyoengqvunz naj riu sim yungz, ndawsim ngeix haujlai haujlai.

Ranzmbanj gou dwg aen mbanj iq bienbik ndeu, gizneix liz singz gig gyae. Gaxgonq mbanj raeuz vanzging gig ca, loh cienzbouh dwg lohdoem, dauqcawq gumzgumz gamxgamx. Ci hung hai gvaqdaeuj couh gienj hwnj baenz raq baenz raq doemboenq, saek dwk hawj mwngz diemheiq mbouj hwnj bae. Bungzdaengz seiz fwndoek engq cuet, gwnz loh cungj dwg boengz, baez mbouj siujsim couh loemq roengz ndaw gumz bae, danghnaeuz miz ci hai gvaqdaeuj, gij boengz couh sinz daengz gwnz ndang bae uq liux. Laj din raeuz yienzlaiz dwg aen gumz hung ndeu, vunzmbanj cungj dawz nyapnyaj boeg youq gizneix, gizneix ciemhciemh bienqbaenz gij dieg gwnninz duznou lo. Vunz lohgvaq cungj mbouj nyienh yawj gvaqbae.

“Lajmbanj Cenghseuq, Vujmingz Gyaeundei”hozdung youq daengx yienh gak dieg gaihcanj hwnjdaeuj, mbanj raeuz hix mbouj laehvaih, bouxsai bouxmbwk、bouxlaux lwgnyez cungj hengzdoengh hwnjdaeuj, gyahaeuj ndaw cawzcingh nyapnyaj hozdung bae. Cibgeij ngoenz seizgan, aen mbanj bienq yiengh lo: Lohdoem bienqbaenz lohsuijniz, gumz nyapnyaj bienqbaenz dieg guh’angq……

Gou saenq, riengz sevei mboujduenh cinbu, ranzmbanj raeuz itdingh bienq ndaej yied daeuj yied ndei.

(指导老师：潘文清)