Dangzgo dwg daeglwg bohlungz gou, de dwg hagseng roek nienzgaep, beix gou bi ndeu. Bohlungz gou dwg baujgezyenz mbanj raeuz, dangzgo gou gingciengz bang bohlungz guhhong, baenz boux baujgezyenz iq ndeu. Dangzgo caeuq bohlungz ityiengh, doiq faenh hong neix nyinhcaen fucwz, vunz ndaw mbanj bouxboux cungj haenh.

Geiq ndaej aen singhgiz gonq, doengzdoih Siujyungj iu gou gaen de daengz ndaw bouq gai doxgaiq bae cawx haujlai doxgaiq gwn. Raeuz itmienh byaij itmienh gwn, lij angqvauvau dwk gangjriu. Gou dawz daehbaucang gijgwn cuengq haeuj ndaw daehsuliu, dajsuenq gveng haeuj aen doengjnyapnyaj bae, mbouj siengj daengz Siujyungj baez dued gvaqbae cigsoh gveng youq gwnz lohmbanj. Gou gienq de dawz nyapnyaj gip hwnjdaeuj gveng haeuj doengj- nyapnyaj bae, de sawqmwh hemq hwnjdaeuj：“Mwngz caen gyaez guenj gij saeh vunz, gou mbouj caeuq mwngz guhcaemz lo.”Gangj sat fatheiq dwk byaijdeuz lo. Gou cijndei gungj hwet bae gip nyapnyaj. Sawqmwh dingqnyi miz vunz hemq：“Siujyungj, mwngz daengx mbat he!” Gou ndwn soh swnh sing baez yawj, yienzlaiz dwg dangzgo hemq Siujyungj. Seizneix, Siujyungj gaenq byaij bae maqhuz gyae lo, dingqnyi sing hemq, hix nyeux gyaeuj doxdauq, yawjraen dangzgo cingq yawj swhgeij, daegdaengq caemdingh dwk cam：“Mwngz miz maz saeh ne?”Dangzgo vix daeh nyapnyaj, yiemzsuk dwk doiq de naeuz：“Mwngz hix dwg hagseng roek nienzgaep lo, wnggai guh yiengh ndei hawj daegnuengx dahnuengx yawj cij deng. Cingj mwngz dawz daeh nyapnyaj neix gveng haeuj aen doengjnyapnyaj bae!”Siujyungj roxnyinh swhgeij loek lo, cijndei lauxlaux saedsaed byaij dauqma, dawz daeh nyapnyaj gveng haeuj ndaw doengj bae.

Daj baezneix hwnj, Siujyungj hix caeuq dangzgo ityiengh, baenz boux baujgezyenz ndaw mbanj lo. Raeuz doengzsim doengzhoz, dawz “Vujmingz

Gyaeundei, Lajmbanj Cenghseuq”hangh hozdung neix guh ndaej engqgya ndei.

(指导老师：潘文清)