21、Youq Liengzdungz Maeuqdiemj.

Bi 1964 ndwen 9, Swcigih Dangjveij ciuq gij baijbouh cunghyangh, daj swcigih、digih、yienh sam gaep ndawde coudiuh bang ganbu okdaeuj, gyoebbaenz 5 aen duenzguhhong, faenbied bae daengz Vujmingz、Canghvuz、Yilinz、Yungzanh、Cingsih 5 aen yienh guh hong sawqdiemj “seiqcing” lajmbanj, geij boux Swcigih Dangjveij suhgi, cawz gij vunz louz youq gihgvanh cujciz hongbingzseiz caeuq ca hong se’gyau aensingz haenx le, cungj haeuj mbanj maeuqdiemj bae lo.

Vihliux fuengbienh lienzhaeh vunzmbanj, Veiz Gozcingh vaqmingz heuh guh “Veiz Dungh”, caeuq gij doengzdoih wnq youq ndwen 9 ngoenz 15 doengzcaez daj yienhsingz Vuj- mingz byaij daengz Cwngzsiengh Gih Liengzdungz Gunghse, haeuj ranz binznungz ndeu bae youq.

Seizde, Guengjsae siu bae le dadui aen genci neix, gaij dagunghse baenz gih. Liengzdungz Gunghse yienzlaiz dwg aen dadui ndeu, dagunghse gaij baenz gih le cix baenz le Liengzdungz Gunghse, bi 1965 seizdoeng siu gih dauqfuk dagunghse le youh bienqbaenz Liengzdungz Dadui, seizneix dwg Cwngzsiengh Cin Mbanjdadungz caeuq Mbanjdaliengz song aen mbanj neix.

Aendoih guh hong “seiqcing” Liengzdungz miz 100 lai vunz, cujyau dwg gij ganbu swcigih caeuq Vujmingz Yen. Youz Swcigih Dangjveij Senhconzbu fubucangj Ho Yiyenz guh duicangj, Vujmingz Yen fuyencangj Dwng Veizcoz dwg fuduicangj. Doihguhhong laeb miz ranzbanhgoeng bonjfaenh, faen 6 gaiq dieg bae guh hong.

Haeuj diemj le, gyoengq boux gunghcozdui hagsib le gij gingniemh diegrog. Veiz Gozcingh giengzdiuh, cingzgvang bouxwnq caeuq cingzgvang raeuz mbouj doxdoengz liux, gij gingniemh ndei bouxwnq, raeuz aeu hawsim hagsib, hoeng, gaej gihgai bae ciuqbuen.

(caengz sat)