Doengzhag Donhciuh Cingz

Mbwk: Gyanghwnz ninz mbouj ndaek,

Dingq gaeujvaeg dingh geng;

Aen sinhoj dwgrengz,

Ngoenzneix deng cij rox.

Nuengx nyaeb loek duzbaiz,

Dai lwgda mbouj laep;

Gyanghwnz ninz mbouj ndaek,

Dingq gaeujvaeg dingh geng.

Caengz gwn gvaq makdoengj,

Mbouj rox soemj rox diemz;

Aen sinhoj dwgrengz,

Ngoenzneix deng cij rox.

Sai: Gaeq haen seiq haen sam,

Mbouj nanz ranz cix rongh;

Lajmbwn ndi gag nuengx,

Seizgonq daihbaj vunz.

Gonq daet gaeu langh faex,

Ngoenzneix ndaej soeng ndang;

Gaeq haen seiq haen sam,

Mbouj nanz ranz cix rongh.

Nyaeb duzbaiz mbouj ndei,

Vut roengz reih cij suenq;

Lajmbwn ndi gag nuengx,

Seizgonq daihbaj vunz.

Mbwk: Riengz doih gangj goj riu,

Simciuz gag gwnheiq;

It youh gaz lwgsaeq,

Ngeih youh heiq guhhong.

Gwnz mbwn roengz begsiet,

Cienz rwed doiq goliux;

Riengz doih gangj goj riu,

Simciuz gag gwnheiq.

Ngoenz cibngeih cungdaeuz,

Hwnj roengz laeuz cungj geiq;

It youh gaz lwgsaeq,

Ngeih youh heiq guhhong.

Sai: Aen nanzcawq haemzhoj,

Camz ce coq gwnzndang;

Rumzbaek mbouj geij nanz,

Rumznamz couh gvaqdaeuj.

Gip hix mbouj boux bang,

Fanz hix mbouj boux gyoh;

Aen nanzcawq haemzhoj,

Camz ce coq gwnzndang;

Naihsim ciengx lwgsaeq,

Cinj faexndoek buenx rangz;

Rumzbaek mbouj geij nanz,

Rumznamz couh gvaqdaeuj.(5)