(ciep geiz gonq)

Duenh roen neix engq lingq engq yiemj, caeklaiq song henz miz diuz lanzganh hawj vunz gaem. Youq dieg haijbaz sang benz doxhwnj daegbieg dwgrengz, moix senj yamqdin cungj sinhoj. Miz haujlai hekyouz benz daengz doekbyongh couh mbouj nyienh caiq benz lo. Gou yaep benz yaep dingz, haeujsim diemheiq baujciz rengzndang, mwh gou benz daengz aen bingzdaiz ceiq dingjgwnz daengx ndang cungj dwg hanh caez. Goengmbwn lumjdwg roxyiuj nei, yaepyet youh bienq ndaej seuqsag hwnjdaeuj.

Saedcaeq aen bingzdaiz daihsam haijbaz lij ngamq dwg 4680 mij, liz dingjbya vanzlij haemq gyae, mboujgvaq caiq mbouj miz roen benz doxhwnj lo. Daujyouz naeuz naemj daengz sengmingh ancienz, hix mbouj caiq hawj hekyouz luenh benz hwnjbae. Gizde ceiq yinx mwngz danqhaenh dwg, miz song diuz raemxnae daj caeksang bonghsasa doekroengz conghnae laeg bae, yienj ok yiengh baijdaeuz “lungzsaenz raen gyaeuj mbouj raen rieng”; youq gizde, mwngz ndaej yawjraen dingjbyanae lumj gyaeuj duzlungz nei, youq ndit ciuq baihlaj fat ok ndongqlwenq；mwngz hix ndaej yawjraen ‘mij ndit ndeu’ yiengh riuzgangj ndawbiengz haenx.

Gwnz dwg mbwnlamz fwjhau, laj dwg rinranx naegiet. Rumzbya yied ci yied haenq, gou ndaengmoj ciuhvunz ngoenzneix ndaej benz daengz dieg haijbaz baenz sang!

Byanaeyilungz youq ndawsim gyoengq beixnuengx Nazsihcuz dwg byasaenz, gij gojgaeq gvendaengz de miz lai yiengh. Miz vunz riuzgangj de dwg duzsaenz baujhoh gyoengq beixnuengx Nazsihcuz —— Saenz- sanhdoj. Moix bi liggaeuq ngeih nyied cobet youq din Byanaeyilungz cungj miz aen yizsi baiq saenzsanhdoj ndeu, gij laizyouz de couhdwg yienghneix okdaeuj. Daujyouz lij lwnh aen gojgaeq ndeu hawj dou nyi: Gaxgonq miz daeg mbauq Nazsihcuz ndeu, aenvih de maj ndaej mbauqndei, yinx dwk gyoengq saulengj seiqlengq ceng daeuj caeuq de damzyoux. Vih hawj daegmbauq yawj hwnj swhgeij, moix bi sam nyied sam haicin cungj miz bang sau daeuj bakdou ranz de diuq foux eu fwen, hoeng daegmbauq cungj mbouj leixlangh gyoengqde. Miz baez ndeu, bang sau neix youh doengx- haemh youq gizde ciengq go diuq foux, guh daengz daegmbauq ninz mbouj ndaek. De cijndaej hai dou ok rog daeuj gvaeh, sawqmwh ngaiz sing fwen goksak ndeu yinx dwk mbouj nyienh byaij lo, laxlawz dwg dah saulengj ndeu daegdaengq eu fwen daeuj hawj de nyi. Daegmbauq simdoengh lo, caeuq dahsau doiq fwen daengx hwnz, mbouj rox mbouj nyinh song bouxde doxmaij hwnjdaeuj. Mwh yaek faenbiek, daegmbauq daengq dahsau naeuz: Bilaeng haicin de youq hamq baihnamz Dahginhsahgyangh caj de baenzranz, dahsau sim’angq dangq- maz …… Muengh ha, muengh ha, daegmbauq youq henz dah caj bae muengh dauq, hoeng cungj mbouj raen dahsau daeuj caeuq de doxraen. De youh itcig ndwn youq gizde caj bi daengz bi. Doeklaeng miz vunz naeuz de nyi, aenvih dahsau mbouj nyienh bohmeh bik de haq hawj bouxmiz, diuq Dahginhsahgyangh dai lo. Daegmbauq rox le siengsim dangqmaz, gietdingh ciuhvunz mbouj caiq damzyoux. Daj mwhde hwnj daegmbauq ngoenz- ngoenz ndwn henz dah ngeix dahsau, ngeix ha ngeix ha, ngeix daengz byoemgyaeuj hau liux, doeklaeng de bienqbaenz goengq Byanaeyilungz. Miz vunz youh naeuz, song diuz raemxnae dingj Byanaeyilungz dwg gij raemxda daegmbauq ne! Daujyouz lij naeuz, beixnuengx Nazsihcuz soqlaiz yawjnaek gamjcingz, gyoengqde dawz cingzmaij beijlumj byanae baenzneix cinghseuq!

Dingqnyi daujyouz lwnh daengz gizneix, gou doiq goengqbya lajdin neix gingqboiq hwnjdaeuj, hix doiq song diuz raemxnae dangqnaj miz yiengh ndiepgyaez ndeu. Dwg ha,goengq bya neix dwg duz saenzsanhdoj, de mboujdanh henhoh gyoengq beixnuengx Nazsihcuz caeuq hawj gyoengqde fat ok yiengh Dunghbah Vwnzva gaeuqgeq caemhcaiq lij henhoh doenghgij beixnuengx gak aen minzcuz seiqlengq de hoenghhwd doxhuz; de baenzneix hausag cinghseuq, cix rox hawj dieg baihnamz riuzgangj baenzlai gojgaeq doxmaij doenghvunz, lumj gojgaeq Ronghndwen Okdaeuj Ronghsagsag、 Haj Duj Vagim、 Ahsihmaj……

Raemxmok daj dingjbya menh- menh gienj roengzdaeuj dawz dou homh dwk, hawj dou lumjdwg menhbyaij youq ndaw fwj, yiengh gingjsien neix dwg boux dieb daengz neix cij ndaej daejniemh daengz ha! Fwjndaem gwnz gyaeuj yied daeuj yied na, rumzbya beij daxbaenh ci ndaej engq haenq lo, yawjdaeuj fwnraq youh yaek daengz, dou mbouj ndaej mbouj byaij dauq dieg bingzdaiz hung daengznduj neix.

Mwh doxdauq youq ndaw lanj- ceh, gou haeujsim yawj doengh gvangqlangh lajdin byanae, gou rox doenghgo gwnz gauhyenz baenzneix heuyauyau, dwg baengh miz raemxnae daeuj nyinhcumx; hix dwg caemh aen laizyouz neix, mieng singz Li’gyangh cij rox raemx lae cien bi mbouj rox duenh gvaq! （sat）