Bineix, dwg bi Nanzdanh Yen Lijhuz Yauzcuz Yangh、Bazhih Yauzcuz Yangh laebbaenz 30 hopbi de. Vih guh ndei hong guh minzcuz yangh yanghging, aen yienh neix yienhveij、yienh cwngfuj cizgiz fazcanj yanghging hanghmoeg. Ciuq gyoepsuenq, daj bi’gvaq daeuj, aen yienh neix doenggvaq lai cungj fuengsik comz cienzngaenz, cujciz saedhengz Lijhuz、Bazhih song aen minzcuz yangh neix yanghging hanghmoeg. Aen yienh neix daj- suenq roengz 1.6059 ik maenz, gaenq lozsiz cienzngaenz 1.4074 ik maenz, gaenq guh sat roengzcienz 1.1262 ik maenz, ndawde gij bumwnz baihgwnz roengz 8215 fanh maenz, yienh caizcwng roengz 2368 fanh maenz, vunzlai gag comz ndaej le roengz 678 fanh maenz. Saedhengz gij hanghmoeg neix, cungdenj guh ndawsingz lajmbanj yienghsiengq gaijndei、minzcuz vwnzva cunghab gvangjcangz、gyauyuz、veiswngh、raemx、dienh、roen daengj gihcuj sezsih gensez nem fazcanj daegsaek canjyez daengj. Guh gij hanghmoeg neix, mizyauq dwk gaijndei minzcuz yangh gij gihcuj sezsih, hawj minzcuz yangh gak minzcuz ginzcung ndaej souh’ik dahraix.

(Yangz Caijyenz/杨彩元)