●6 nyied 28 hauh, liggaeuq dwg loeg nyied co’ngeih, Yungz- suij Myauzcuz Swciyen Bwzyinz Yangh Baujgyangh Mbanjdungcuz gawjbanh cietlauzbya, geij bak boux beixnuengx saujsu minzcuz daj mbanj doxgyawj daeuj de youq ndaw dah’iq lumh bya、doxdued bya、doxgonh raemx, nauhyied vuenyungz raixcaix.

(Lungz Linzci)

●5 nyied daej, Vanzgyangh Mauznanzcuz Swciyen bonj sawson vwnzva minzcuz dangdieg 《Funghcingz Mauznanz Hom Doh Vanzgyangh》okbanj fathengz lo, daengx bonj saw gungh 10 fanh cih saw. Aen yienh neix minzcuzgiz roengz 18 fanh maenz, okbanj 15000 bonj. Bonj saw neix dwg sawson vwnzva minzcuz dangdieg, yaek youq ndaw yienh cungh siuj yozyau sawjyungh.

(Veiz Vwnjbangh)

●6 yied 27 hauh, Sangswh Yen ciuhai minzcuz mouyi canjbinj giyez codanzvei. Aen yienh neix daj 2011 nienz daej heijguh hong sinhbau minzcuz mouyi canjbinj giyez, dangqnaj gaenq dingh 22 aen, ndawde miz aen ndeu dwg minzcuz canjbinj giyez. Sam bi daeuj, gij giyez neix gungh ndaej boujdiep doenghgij leihsik daigvanj 3296 fanh maenz.

(Cinz Haijcing Lij Yiyungj)

●Gaenh bi daeuj, Ningzmingz Yen yawjnaek aeu lai cungj fuengsik doiq doenghboux caengz rim cibbet bi de guh gohbuj gyauyuz hozdung. Daengz 4 nyied 18 hauh, daengx yienh laeb le lajmbanj byauhcunj saunenzgungh 2 aen, saunenz ginhyau aen ndeu. Bineix 1 daengz 3 nyied, aen yienh neix cungh siuj yozyau guh gak cungj gohbuj hozdung 80 lai baez, 4 fanh lai hagseng camgya.

(Couh Yizgangh Vangz Gvanginh)

●Geij ngoenz gonq, Yungzanh Yen bineix gij hong ranz giswngh camgya sinhhingz nungzcunh hozcoz yihliuz de gaenq guh sat lo, miz 7729 hoh 22417 vunz mbouj hoj gyau cienz hix ndaej camgya. Ciuq cam rox, 8 bi neix, aen yienh neix gungh miz 13.0912 fanh vunzbaez souh’ik.

(Veiz Cujswz Cangh Siulanz)