Dangbi ndwen 8, Cunghgung Cunghyangh fucujsiz、guekgya cujsiz Liuz Saugiz daengz Guengjsae sonyinx guh hong. Veiz Gozcingh gyoeblwnh guh hong hawj Liuz cujsiz, daegbied gangj le gij haemzhoj dieglaux, muengh guekgya daj cwngcwz、ngaenzcienz caeuq doxgaiq gij fuengmienh neix bangfuz gyoengqde. Liuz cujsiz dingjqnaeuz dieglaux haemzhoj raixcaix, gig gamjdoengh, cix heuh Guengjsae raiz faenh baugau ciendaez hawj baihgwnz.

Bi 1964 ndwen 9 ngoenz 21, youq Veiz Gozcingh cujciz lajde, Guengjsae Bouxcuengh Swcigih Lwgminz Veijyenzvei raiz le faenh baugau hawj Guekgya Giveij, fanjyingj gij saehsaed haemzhoj dieglaux dieggoek gwzming Guengjsae, muengh guekgya daj hwnjguh suijli nazreih、vunz caeuq doihduz gwn raemx、gyaudoeng dajyinh、sonsaw、veiswngh daengj 5 giz, roengzngaenz roxnaeuz boujngaenz hawj vunzlai dieglaux. Faenh baugau neix doengzseiz cingz hawj Cunghgung Cunghyangh Cunghnanzgiz Giveij, caemhcaiq ciusoengq hawj Guekgya Minzveij、Suijdenbu、Gyauhdunghbu、Gyauyuzbu、Veiswnghbu. Cunghyangh mizgven bumwnz haemq yawjnaek aen baugau neix, gvaqlaeng ne gig hwnjheiq dingjrengz caeuq bang- coengh gij dieglaux gwzming Guengjsae.

Veiz Gozcingh doenghbaez genyi Dauz Cu gvaq, muengh de ndaej vangq cix bae Baksaek gaujcaz baez ndeu, sonyinx caeuq bangcoengh aen dieglaux neix hwnjguh. Dauz Cu caemh lai baez naeuz, de youq Guengjsae daiqguh swngjveij suhgi gaenh bi ndeu, gij dieg wnq ceng mbouj geijlai de cungj byaij gvaq lo, couh ceng Baksaek Digih caengz ndaej bae gvaq, nyinhnaeuz ienqhoij dangqmaz, naeuz dingh ra hoengq bae ngonzngonz.

Bi 1965, Dauz Cu daiq song boux goengdaeuz cunghnanzgiz faenguenj hong caizgingh caeuq faenguenj hong giva haenx Lij Yizcingh caeuq Couh Cunhgvangh daeuj lo. De bonj siengj bae Baksaek lai yawj geij giz, hoeng gyangroen ciep ndaej dunghcih, naeuz cunghyangh yaek hai hoih, heuh de doq dauqbae Gvangjcouh, de cijndei dingzsat gij giva gaujcaz Baksaek lo. Ciuq gij iugouz Veiz Gozcingh, Dauz Cu gietdingh, daj gij ngaenzgihdung ndawde buet mbangj ngaenz bae dingjrengz dieglaux guh suijli.

(caengz sat)