（ciep geiz gonq）

Siengj daengz couh guh daengz, ngoenz daihngeih, daxmeh bae guhhong, gou hix gwed fag gvak ndeu riengz de bae. Youq gwnz loh, gou mienh byaij mienh siengj gyaeqgaeq haenx, byaij daengz henz dah, gou gyajcang daemjndoet baez ndeu doek roengz bangx haenzdah bae, gou sikhaek gaemdawz go gaeu ndeu venjnungneng hwnjdaeuj, lij “daej” nga’nga hwnjdaeuj. Daxmeh sikhaek buet gvaqdaeuj, de doq yungh cax fwet nya doq dawz gou rag hwnjdaeuj, doengzseiz hix ndaq naeuz:“Ya, boihseiz lo, youh deng rwihoenz baez ndeu lo, lwg maeuzsaeu mwngz neix.” Gou mienh “daej” mienh naemj: Rwihoenz ndei, haemh neix rouhhoenz gou couh ndaej gwn gyaeqgaeq lo.

Haemhhaenx, daxmeh youq ndaw laeuxgaeq aeu aen gyaeqgaeq ndeu bae henz dah rouhhoenz dahraix. Rouhhoenz maranz, daxmeh couh cien aen gyaeqhoenz haenx hawj gou gwn. Aenvih cij miz aen gyaeq ndeu, mbouj gaeuq baen hawj dou geij beixnuengx caezgya gwn, daxmeh hawj gou gag haeuj ndaw rug bae gwn, gou roxnyinh aen gyaeqhoenz haenx feih dangqmaz. Daxmeh lumh gyaeuj gou naeuz:“Lwg ha, baezlaeng byaij loh aeu siujsim di, mboujnex youh noix bae duz gaeq ndeu lo, cienz gyu raeuz couh hoj ra lo.”

Dingq gij vah daxmeh, gou roxdaengz swhgeij loek lo, hix mbouj gamj lwnh saeh caen hawj daxmeh nyi, itcig daengz seizneix hix mbouj lwnh hawj byawz nyi, cijnaengz dawz gienh saeh haenx yo youq ndaw dungx ndaw uk ciengxlwenx mbouj rox lumz.

Daengz gou camgya gunghcoz le, ndaw daeh miz di cienz lo, ndaw ranz gwndaenj ngoenz beij ngoenz ndei, gij gwn gij daenj mbouj you lo. Bi’gvaq, doenggvaq gaujsi, gou lij ndaej daeuj yienhsingz guhhong, lij ciq ngaenz cawx ndaej aen ranzmoq ndeu.

Miz ngoenz ndeu singhgiz roek, daxmeh daj mbanjranz daeuj ranz gou, gou daiq de bae cauhsi youz, ndaw cauhsi doxgaiq rim da bae, siengj cawx gijmaz miz gijmaz. Roxnyinh gaenq haujlai nanz mbouj gwn gyaeq lo, gou couh cawx song gaen gyaeqgaeq doj ma gwn. Gwn caeuz seiz, gou cien geij aen gyaeqgaeq cuengq youq gwnz daiz haenx, dahniq cimz aen ndeu le naeuz haeusing lai mbouj baenz gwn, daxmeh hix naeuz gij gyaeq haenx mbouj hom mbouj feih, mbouj lumj gij gyaeq lajmbanj gag ciengx gaeq ok haenx miz feihdauh. Ndaw cauhsi naeuz gyaeqdoj ne, gaen cibhaj maenz. Gou baez dwk haeuj bak, caen lumj gyoengqde gangj ityiengh, youh ndongj youh haeusing, doeklaeng vanj gyaeq haenx deng vut youq gwnz daiz mbouj miz vunz leixlangh lo.

Hai, vihmaz seizneix lienz gyaeq gaeqdoj hix mbouj baenz gwn lo? Youq seiz lij iq, aen gyaeqhoenz haenx dwg yienghhaenx miz feihdauh, gou youh siengjniemh aen gyaeqhoenz seiz lij iq haenx hwnjdaeuj.

(sat)