Mbwk: Uengjfeiq liux uengjfeiq,

Di aemqceih vaihmingz;

Donhciuh doengzhag cingz,

Mwngz lumz liux ha beix.

Doegsaw caez gadaiz,

Gwn ngaiz nyinh daengz beix;

Uengjfeiq liux uengjfeiq,

Di aemqceih vaihmingz.

Danggonq raeuz doxlaeg,

Gamjcingz naek baenz rin;

Donhciuh doengzhag cingz,

Mwngz lumz liux ha beix.

Sai: Gaej gangj aen uengjfeiq,

Cog diendeih hai aen;

Gaej doeknaiq ha ngaenz,

Go nyinh daengz mwngz nuengx.

Caez byaij hwnj byaij roengz,

Nanz lumz mwngz cingzeiq;

Gaej gangj aen uengjfeiq,

Cog diendeih hai aen.

Naeuz nuengx mwngz gaej heiq,

Lauxbeix ciuq goj raen;

Gaej doeknaiq ha ngaenz,

Go nyinh daengz mwngz nuengx.

Mbwk: Haemh haeuj mbonq roengz-

ninz,

Ciengz loq raen mwngz beix;

Nuengx baenz duzbyaleix,

Soujcaj beix vunzlungz.

Gwj siengj gyaeg youh gyaeg,

Ninz ndaek hix mbouj lumz;

Haemh haeuj mbonq roengzninz,

Ciengz loq raen mwngz beix.

Caih hongrog hongranz,

Gag fanz youh gag heiq;

Nuengx baenz duzbyaleix,

Soujcaj beix vunzlungz.

Sai: Raemxmboq dauq rim daemz,

Bya daeuj haenx guhhaw;

Loegcib byaij loh cwng,

Gaem dwngx lij doxcunz.

Seizgonq caez diuqfoux,

Fwngz yied nyouj yied maenh;

Raemxmboq dauq rim daemz,

Bya daeuj haenx guhhaw.

Ranz mwngz youq Hozcangh ,

Gou lajmbanj Yinhcwngz;

Loegcib byaij loh cwng,

Gaem dwngx lij doxcunz.

(3)