Dahsau seizcin yamq yamqdin mbaeumbeng daeuj daengz gwnzbiengz, heuh singj gij vaging ninz caem haenx. Vaging nyouq daengz heiq seizcin, couh daj ndaw rug va ndonj aen gyaeuj okdaeuj.

Ngoenzneix, vaging ranz gou hai lo, gyoengqde lumj lwgnyez bizboed hausag, caenx youq giz ndeu, gig nauhyied. Gyoengqde mizdi lumj dahsau najnyaenq, ndoj youq laeng ngefaex, mbouj gamj raen vunz; mizdi lumj duz non’iq gikgyat, ndoj youq ndaw lupva ninz; lij mizdi ngiengx coh daengngoenz hailangh, ndit rongh ciuq gyoengqde, lumj gaiq nyawh hau ronghcingx gyaqciq……

Raq rumz seizcin ci gvaqdaeuj, gwnz nge venj rim vaging baenz comz baenz comz, lumj doih “dahsien hau” cingq diuq foux, youh lumj cingq heuh gyoengqvunz bae ngonz gyoengqde, bae cimz gij gyaeundei gyoengqde. Gij heiq hom vaging yinx daeuj haujlai duzmbaj, gyoengqde lumj dwg daeuj caeuq vaging doxbeij gyaeundei, hoeng yawj daengz vaging yienghhaenx gyaeundei, cijndaej najhoengz dwk laeglemx deuz lo.

Neix couhdwg vaging, de gawq buzsu youh dasang. Seiz caem lumj boux dahsau hung maezvunz, seiz doengh youh lumj lwgsau iq, cibfaen nyex vunz.

(指导老师：罗秀荷)