Gou gaenq laihnaeuz, gwnz- biengz goulau gaenbonj mbouj miz gyaez. Hoeng, ginglig baez haenx le, gou cij fatyienh, gwnzbiengz gizgiz miz caen- gyaez.

Geiq ndaej seiz gou lij iq, fatseng gienh saeh ndeu, gienh saeh neix ca di hawj gou yaek vutmingh bae, dwg daxboh yungh caenh goengrengz cij daj ndaw fwngz duzfangzdai duet gou dauqma.

Haemh haenx, gou mbouj rox baenzlawz lo, youq ndaw rug gag laemx, in ndaej daejnga’nga hawjdaeuj. Daxboh dingqnyi le, sikhaek buet daengz ndaw rug gou.Daxboh raen gou ringx youq gwnz dieg daejnga’nga, vueng dwk mbouj rox baenzlawz guh cij ndei. Gou lumjnaeuz dingqnyi daxboh heuh gou, lij lumjnaeuz yawjraen daxboh umj gou. Aeya! Baenzlawz baenzneix ndat? Mbouj ndei, haengjdingh noh fatndat lo. Daxboh caiq mbouj gangj gijmaz, umj gou hwnjdaeuj, couh vaiq buet bae cunhgunghsoj yihvusiz.

Daj ranz gou daengz cunhgunghsoj yihvusiz dwg diuz loh gaebgeb ndeu. Vihliux gouqmingh, youq gwnz diuzloh gaebgeb neix, daxboh mbouj rox laemx liux geijlai baez, hoeng, de goq mbouj ndaej baenz lai lo, moix baez laemx le, benz hwnjdaeuj, vanzlij nyaenx in dwk, mbouj dingz buet dwk. Couh yienghneix, daihgaiq gvaq baez diemj cungj ndeu, daxboh dauqdaej dawz gou daengz cunhgunghsoj yihvusiz lo. Mwh gou singj gvaqdaeuj seiz, yawjraen aennaj daxboh yienghhaenx baegnaiq, gou ndonj haeuj ndaw rungj daxboh bae, raemxda doekfoenfoen, cungj raemxda neix dwg raemxda vuenyungz, dwg raemxda boiz aen.

（指导老师：陆春梅）