Gyoengqde baezneix okbae, caemh dwg bae caenh’itbouh ngeixyaeng leihyungh dienhguenq cou raemx gaijgez nazreih Dieggumz Dahyougyangh yungh raemx guh ndaej guh mbouj ndaej doeng. Cinz Yinggih nyinhnaeuz, cijaeu miz dienh le, leihyungh dienhguenq cou raemx gaijgez gizneix yungh raemx dwg guh ndaej doeng.

Gyoengqde danghaemh cix daengz Baksaek, caeuq gij dungzci diveij doengzcaez vuenheij gwn ndaep. Bonjlaiz, Veiz Gozcingh lij siengj caeuq gij goengdaeuz dungzci diveij damzdamz guh hong, gij dungzci diveij naeuz, haemhneix miz vwnzyi yienjok, genyi ngoenzcog caiq damz. Cinz Yinggih naeuz, ngoenzneix gwncieng, bae caeuq daihgya ngonz biujyienj gonq, ngoenzcog caiq damz ba! De doengzeiq lo.

Ndwencieng coit, diveij guh le gyoeblwnh hawj song boux goengdaeuz swcigih. Liux le Yangz Lez、Cwng Saudungh、Cinz Canj daengj vunz lij buenx gyoengqde bae ngonzyawj le Gvanjvwnzvuz Gwzming Dahyou- gyangh caeuq Suijgu Dahcwngzbihoz.

Dangngoenz banringzgvaq, gyoengqde daiq gij vwndiz dieglaux liz Baksaek, gig haemh cix dauqma daengz Namzningz.

Veiz Gozcingh caeuq Cinz Yinggih daj Baksaek dauqma mbouj ndaej geij nanz, Danz Cinlinz fucungjlij ndaej iucingj daengz Guengjsae gaujcaz, Veiz Gozcingh daegeiq cingj fucungjlij bae Baksaek ngonzngonz, muengh de bang vunzlai dieglaux gangjgangj vah. Fucungjlij dapwngq lo, de dingq diveij gyoeblwnh le naeuz: “Aen dieglaux gwzming neix ok gvaq haujlai goengrengz hawj hongsaeh gaijfang Cungguek, seizneix vanzlij maqhuz hoj, gou sim nanzsouh ha!” De dapwngq dauqbae le cix caeuq mizgven bumwnz ngeixyaeng, caenhliengh bangmuengz.

(caengz sat)