Mbwk: Ndwen caetnyied cibseiq,

Bae Gaeujeij doxcunz;

Baengh mehbaj Genzrumz,

Gangj daengz mwngz caux rox.

Biek nanz ndi doxraen,

Sim caem hoz youh geiq;

Ndwen caetnyied cibseiq,

Bae Gaeujeij doxcunz.

Bya dauq raen raemxmoq,

Hoh lauxgo baenz vunz;

Baengh mehbaj Genzrumz,

Gangj daengz mwngz caux rox.

Sai: Hwnzngoenz gou gw muengh,

Docih nuengx mbouj lumz;

Baengh mehbaj Genzrumz,

Dauq doxbungz ngoenzneix.

Doxbiek geij cib bi,

Gamjcingz ndicaengz duenh;

Hwnzngoenz gou gw muengh,

Docih nuengx mbouj lumz.

Suenq raeuz miz fukheiq,

Ngeix cingzngeih mbouj lumz;

Baengh mehbaj Genzrumz,

Dauq doxbungz ngoenzneix.

Mbwk: Geij cib bi mbouj raen,

Dangq baenz boux sengmienh;

Dangcw ndimiz dienh,

Fuk lij cuenq rox ndwi.

Saet nanz ndi caiz vaq,

Mbouj rox naj baengzndaem;

Geij cib bi mbouj raen,

Dangq baenz boux sengmienh;

Daj bouxgvan gou dai,

Guhmaiq baenz vunzcienh.

Dangcw ndimiz dienh,

Fug lij cuenq rox ndwi.

Sai: Dangx cw fug ndi moq,

Raeuz vuenh coq goleiz;

Daeuh dauq bienqbaenz feiz,

Lauqhei mbouj fukfaenh.

Gvan dai lwg guhgyax,

Gangj maz mizdi gyoh,

Dang cw fug ndi moq,

Raeuz vuenh coq goleiz;

Nuengx guhmaiq lij coz,

Gou rox mwngz gwnvei;

Daeuh dauq bienqbaenz feiz,

Lauqhei mbouj fukfaenh.

(2)