Seiz lij iq, ndaw ranz beixnuengx lai, ngoenznaengz gwn haeux mbouj imq, daxmeh cijndaej yungh rek hung daeuj cawj souhhaeuxyangz, hoeng ndaw ranz geij beixnuengx, moix boux daek sam seiq vanj, ndaw rek couh yaek raen daej lo, souhhaeuxyangz haeux noix raemx lai, sawrikrik, gwn roengzbae mbouj geijlai nanz couh dungx iek lo, rek souhhaeuxyangz mbouj gaeuq dou geij beixnuengx gwn ngoenz ndeu. Seizhaenx, siengj gwn donq noh ndeu gig nanz, lajriengh ciengx miz saek duz bit gaeq, cungj sij mbouj ndaej gaj gwn, daxmeh naeuz, caj duzde hung le, dawz bae haw gai, aeu cienz cawx gyu cawx lauz.

Geiq ndaej miz bi ndeu, caetnyied cibseiq gaj bit, haemhhaenx, daeg- nuengx aenvih gyangngoenz guhcaemz baeg lai, ninz ndaek mbouj roxnyinh gwn caeuz, daxmeh couh nep aen ga’bit caeuq geij gaiq nohbit dwk roengz ndaw ganghaeux ce hawj daegnuengx haetlaeng ndiu daeuj gwn. Gyanghwnz, gou caeuq daegngeih song boux couh laeglemx hwnq daeuj caeg gwn nohbit de liux bae, daxmeh rox le ndaq dou baez haenq ndeu. Seizneix siengj hwnjdaeuj, caen ndeiriu ha.

Seizhaenx, vunz ndaw mbanj saenq cungj maezsaenq ndeu, couh dwg lwgnyez iq doek bangxdaemz roxnaeuz doek bangxdah, bouxgeq couh naeuz lwgnyez deng rwi hoenz lo, aeu bae rouhhoenz ma, baelaeng lwgnyez cij ndangcang. Gyoengqde couh aeu aen gyaeqgaeq roxnaeuz aen gyaeqbit ndeu dwk roengz ndaw roemx bae, lij dwk gaemz haeuxsan ndeu roengzbae, caiq aeu sam diuz yieng daiq boux lwgyez haenx bae daengz henz daemz henz dah, mehbuz de youq henz daemz roxnaeuz henz dah vat sam mbat le cij dauqma ranz, cawj gij haeuxsan caeuq aen gyaeq haenx hawj lwgnyez de gwn, gij hoenz bouxde couh dauq lo. Dingq bouxgeq naeuz gij neix heuhguh “rouhhoenz.”

Gou lij iq hix deng “rwi hoenz” gvaq, hix ndaej gwn gyaeqhoenz gvaq, gij feihdauh de hoem raixcaix.

Miz baez ndeu, gou gag youq ranz guhcaemz, mbouj rox baenzlawz ndonj daengz lajriengh bae yawj raen duz gaeqmeh ndaem ranz gou boemz youq ndaw laeux ok ndaej sam aen gyaeq. Gou couh siengj dawz sam aen gyaeq haenx ma cien gwn, lij caengz ndaej cien, siengj hwnj gij feihdauh hoemswtswt haenx, gou myaiz couh rih lo. Haemhhaenx, daxmeh bae guhhong dauqma, gou couh nauh de cien gyaeqgaeq hawj gou gwn, hoeng daxmeh naeuz:“Mbouj ndaej bw, mwngz gwn aen gyaeq ndeu bae, couh dwg gwn bae duz gaeq ndeu lo, ce gyaeq hawj gaeqmeh faeg ok gaeqnumh, caj duzde hung le gai aeu cienz, sou couh miz buhmoq vaqmoq lo.” Couh yienghneix, aen maqmuengh naemj gwn gyaeqgaeq gou bienqbaenz aenbop lo. Haemhhaenx, gou youq gwnzcongz boek bae boek dauq cungj ninz mbouj ndaek, ndaw cehda cungj dwg yawjraen geij aen gyaeqgaeq haenx. Siengj gwn gyaeqgaeq lai, gou couh siengj daengz rouhhoenz, cijaeu daxmeh bae rouhhoenz, gou couh miz gihvei ndaej gwn gyaeqgaeq lo. Siengj daengz neix, gou mbouj rox mbouj nyinh ninz ndaek lo, ninz ndaej diemzsubsub, fangzhwnz loq raen ndaej gwn gyaeqgaeq, lij dajbak gyopgyop ne.

(caengz sat)